Wir Albrecht von Gots Gnaden Hertzog ze Osterreich, ze Steyr, ze Kernden Veriehen - daz wir angesehen haben den Gebresten, den der Erber Geistlich Man Brobst Rudwein vnd daz Capitel des Gotshaus ze Newnburch von Vbriger gastung Vnz her gehabt hat vnd noch hat vnd den emzigen Vnd erbern Gotsdienst, den die Chorherren teglichen in dem Gotshaus habent vnd auch dadurch, daz des selben Gotshauses gelt aller meist im Wein leit vnd der ofte ververt, haben wir dem selben Brobst vnd allen seinen nachchomen vnd dem Gotshaus ze Newnburch di gnad getan, Vnd tun auch mit disem brif, daz des Brobstes vnd desselben Gotshauses ze Newnburch zehentner ze der Heiligenstat, ze Nusdorf, ze Grinzing, ze Obern vnd ze nidern Sifring, ze Salmanstorf, ze Newstift vnd ze halben Toblich , daz in die pharre ze der heiligenstat gehort alle Presse besuchen mugen vnd sullen in dem Lesen, vnd nach dem zehent da vragen. Man sol auch denselben Zehentnern alle Chelr vnd gadem auftun, da Wein innleit, alz ez daz Goteshaus mit alter gewonhait herbracht hat, daz sie den Zehent dester Chundlicher gevodern vnd genemen mugen vnd in dester rechter gezehendet werde. Vnd daz demselben Brobst vnd seinen nachchomen vnd dem Gotshaus ze Newnburch diselb gnad von Vnsern erben vnd nachchomen fu^er baz also stet vnd vnzebrochen beleib, dar vber - geben wir disen brif versigelten mit vnserm anhangunden Insigel, der geben ist ze Wienn an sand Gilgen tag - dreuzehenhundert iar darnach in dem Newn vnd dreuzigisten Jar.

Source Fulltext: ZEIBIG, Klosterneuburg (=FRA II/10, Wien 1857) S. 274-275