Ich Wolfhart der Alser vnd ich Geisel sein Hausvrawe veriehen - daz wir - vnser gescheft getan vnd geschaft haben, als her nach geschriben stet . . Dez ersten schaff wir - auf vnserm weingarten in dem weingraben, dez ein virtail ist, vnd ein halbev rahen leit zenechst Eberlein dem pater vier phunt vnd sechs schilling gült wienner phenning in vnserer herren der Chorherren Oblay ze Neunburch, Also daz der, der ze den zeiten Oblaymaister ist, alle tag drey pfenning geben schol dem priester, der vronampt singt auf dem vron Alter in vnser vrawn goczhaus ze Neunburch, Also beschaidenleich, ob ich vorgenanter Wolfhart nicht enwer, so schol meiner egenanten Hausvrawn vrawe Geisel den egenanten weingarten inne haben vncz an iren tod - vnd schol die weil si lebt, die vorgenanten vier pfunt vnd sechs schilling raichen vnd geben in die Oblay - vnd wanne die vorgenant Geisel mein Hausvrawe nicht enist, so schol der vorgenant Weingart - den vorgenanten Chorherren in die Oblay gevallen, vnd schol danne der Oblaymaister alle die reht da von begen, als vor geschriben ist, wer aber, daz iht vber wirt, so schol der Oblaymaister vnd die Chorherren mir Wolfharten vnd meiner hausvrawen do von einen Jartach begen nach iren trewen. Dar zu schaff wir mer vnsern weingarten, haist die Eysnein phait, ist ein halbes Jeuch, leit auf der vronpeunt ze nachst dem SchO^enpucher vnd dient ein phunt pfenning an sand Görgen tag dem Erwern man Chunrat dem hagenprunner - vnd schol der Oblaymaister vnd die Chorherren zwen Jartag do von begen - vnd schol der Oblaymaister an den zwain Jartegen einem igleichen herren geben ein semel, die dreier pfenning werd ist, vnd ein Stauf weins demselben weingarten vnd als vil den Junchherren vnd den Pru^edern, als ez von alter gewonhait herchomen ist - Vnd wan wir aigner Insigel nicht enhaben - geben wir disen prief versigelten mit hern Peter dez freisinger ze den zeiten Hofmaister Insigel, der der egenanten Weingarten Perchmaister ist, vnd mit der Erwern ritter Insigeln, hern Gerungs dez Chol vnd hern Haugen dez flO^ecz. - Der prief ist geben ze Neunburch- dreuczehen hundert Jar vnd in dem Virczigsten Jar.

Source Fulltext: ZEIBIG, Klosterneuburg (=FRA II/10, Wien 1857) S. 281-282