Ich Swester Christein div Pru^eschenchinn, ze den zeiten priorinn ze Tuln In dem vrawen Chloster vnd mein Convent, wir veriehen - Daz der ersamm Geistleich herre Brobst Ru^edwein ze Newnburch recht vnd redleich gechauft hat ein Perchrecht von virgiligen dem Pravnstorfer vnd vrowen Agnesen seiner hausvrowen, Otten tochter dez hevnlyns; daz gelegen ist ze Grinczing vmb Sybenczich phunt wienner phenning der er fumfczich phunt div vorgenanten virgiligen vnd vrawen Agnesen sein hausvraw verricht vnd gewert hat, vnd zwainczich phunt vnser swester Annen div Hevnlynn. Vnd darumb lob Ich vorgenante Swester Christein div Pru^eschenchinn vnd mein Convent dem egenanten Ersammen herren Brobst Rudwein vnd seinem Convent, Daz selb Perchrecht recht vnd redleich ze schermen also thewer, als si zwainczich phunt wert sint fur alle ansprach nach des Landes recht in O^esterreich mit vrchund dicz priefes, den ich vnd mein sampnung mit vnsers Convents Insigel ze einer bestetigung diser sache versigelt haben. Der prief ist geben ze Tuln - Dreutzehen hundert Jar dar nach in dem acht vnd viertzigistem iar, viertzehen tag nach vnser vrawen tag der Liechtmess.

Source Fulltext: ZEIBIG, Klosterneuburg (=FRA II/10, Wien 1857) S. 324-325