Ich Irnfrit von dem Clemens Vergich - Daz ich - verchauft vnd geben han meins rechten aygens meinen Stainpru^ech gelegen in Geczendorfer velde vnd swas zu dem selben Steinpru^ech gehoret, swie so daz genant ist - vmb zehen phunt wienner phenninge - Dem erbern herren hern Wolfkern zu^e den Zeiten Pharrer ze ydungspeugen vnd seinen nachchomen, swer da selbens nach im Pharrer ist, also mit auzgenomener rede, daz er mir die Trewe getan hat, ist, daz wir, ich oder mein erben den selben Steinpru^ech wider chauffen wellen, den suln wir denne wider chauffen von dem heutigen Tage inner sechs iarn - an sant JO^ergen tag vmb zehen phunt wienner phenninge - Dar vber so gib ich In disen prief - versigilt mit meinem Insigel vnd mit meins Pru^eder Insigel Jansen von dem Clemens, vnd mit hern Otten Insigil des Spans. Diser prief ist geben ze Wienne - drevzehen hvndert iar‚ dar nach in dem zway vnd fumfczigisten iar des nächsten Phincztages vor Phingsten.

Source Fulltext: ZEIBIG, Klosterneuburg (=FRA II/10, Wien 1857) S. 335-336