Ich Mert der fleischakker, Reinoltz aidem, Vnd ich agnes sein hausfrow, Vnd vnser erben, Wir veriehen - daz wir - mit vnsers perchmaisters hant Fridreichs dez Eytzinger ze den zeiten purgraf ze Chirhlinge verchauft haben ain phunt Wienner phenninge geltes purchrechtes auf vnserm Weingarten mit paw mit alle, dez ain Viertail ist, Vnd leit in dem steinprunne, do man alle iar von dient der Erbern vrowen vro Elspeten von Chirchlinge, hern Albers Witib ain Viertail Weins ze perchrecht vnd ein helblinge ze voytrecht - verchauft vnd geben haben der Erbern ChO^erherrn Oblay hie ze nevnburch vmb acht phunt wienner phenninge - Wier haben auch Recht vnd vrey wal alle iar ab ze lO^esen, welches iar wir mu^egen - swenn daz ist, daz wier der Chorherren Oblay geben acht phunt wienner phenninge, Vnd ain phunt wienner phenninge ze Dienst dor auf, So ist vnser virtail Weingarten mit paw mit alle danne fu^erbaz wider ledich vnd vrey an allen Chrieg var aller Ansprach. - Dor vber - geben wir der Chorherren Oblay den brief versigilt mit vnsers perchmaister insigil, fridreichs des Eytzingner, ze den zeiten purgraf daz Chirhlinge, vnd ze einen gezeuch mit des erbern man insigil Ortolfs des Tutzen, dez Slu^ezzler - Der brief ist geben - dreutzehen hundert Jar darnach in dem fumf vnd Sechtzigisten Jar an dem prehentag.

Source Fulltext: ZEIBIG, Klosterneuburg (=FRA II/10, Wien 1857) S. 414-415