Wir Wandala von Gots gnaden Abptessinn in dem Erbirdigen geistleichen vrown Chloster ze ybs, vnd wir der gancz Convent gemam da selbs vergehen - Vmb alle die chrieg, stO^ezz vnd mizzhellung ‚ di wir gehabt haben mit dem Erbirdigen geistleichen herren hern Ortolfen Probst des Chlosters ze Newnburch vnd mit dem ganczen Convent gemain daselbs Vmb zehen schilling wienner phenning ewigs geltes diensts gelegen auf einer Mu^el ze Chrems vor dem helltar, Daz vns der Erbirdig geistleich herr Abpt Cholman zu dem heyligenchrewcz nach erberr Leut rat, Ritter vnd chnecht darumb paidenthalben mit einander liepleich vnd frewntleich gar vnd genczleich verricht vnd verebent hat, Also mit ausgenommer Rede, daz die egenanten zehen schilling geltes diensts auf der obgenanten Mu^el halb gevallen vnd beleiben sullen dem egenanten Chloster ze Newnburch, vnd halb dem egenanten vnserm Chloster ze ybs furbas ewichleichen ze raichen vnd ze dienen ze den tegen, vnd von alter her chomen ist - Vnd des ze Vrchund geben wir - den prief versigelt wir vorgenante swester Wandala, Abptessin des Chlosters ze ybs mit vnserm Insigel, vnd mit vnsers des Convents Insigel daselbs. Der prief ist geben ze Wienn - Dreuczehen hvndert Jar dar nach in dem Newn vnd Sechczigisten Jar des Phincztags an Gotsleichnamstag.

Source Fulltext: ZEIBIG, Klosterneuburg (=FRA II/10, Wien 1857) S. 428-429