Wir Albrecht von Gotes gnaden, Hertzog ze Osterreich, ze Steyr, ze Kernden vnd ze Krain, Graf ze Tyrol etc. Bekennen vnd tun kunt offenlich mit disem brif Vmb die sechs phunt wienner phenning gelts gelegen ze Newnburg klosterhalben, zwai phunt gelts purchrechts auf Eberharts haus des pinter gelegen in der weiten gazzen, vnd die vier phunt gelts sind rechtez aygen Gruntrecht, daselbs ze Newnburg in der Stat vnd vor der Stat, die vnser getrewer Chraft der Hawser der erbern vnd geistlichen klosterfrowen Dorotheen seiner Tochter datz sand klaren ze Wienn gegeben hat zu iren tegen vnd nach irem tod sulln dieselben gu^elt gevallen zu dem egenanten kloster, daz wir derselben phenning gu^elt, der obgenanten Swester Dorotheen vnd des gantzen Convents datz sand Claren ze Wienn scherm sein vor gewalt vnd vor vnrecht, also daz si eweklichen da bey beleiben vnd die da von nicht enphrömden in dhainen weg, Sunder daz si damit allen iren frumen schaffen nach sag des briefs, den in der egenant Hawser darvber gegeben hat. Mit vrkund ditz brifs. Geben ze Wienn des nesten Samztags vor dem Suntag, so man singt Oculi in der Vasten - dreutzehen hundert iar vnd darnach in dem zway vnd Sybentzigistem Jare. mr. Camr. Sefner.

Source Fulltext: ZEIBIG, Klosterneuburg (=FRA II/10, Wien 1857) S. 444-445