Ich Vlreich der Protner vnd Ich Elspet, sein hausfraw vnd ich Anna sein Tochter wir vergechen - das ich - mit vnsers Pergmaisters hant, des erbern manns Vlreichs von Rust, die zeit Pergmaister des Gotshaws vnser frawn ze Newnburgk verkaufft haben||
vnsern weingarten des ain virtail ains Jeuch ist vnd der do leit vnder dem Chochgraben ze nechst desselben Gotshaus weingarten der do ist genant der Goler - vnd do man von alle iar dient dem egenanten vnser frawn gotshaus drew virtail weins ze Perkrecht vnd drey helbling ze voitrecht - vmb ains vnd zwainzigk phunt vnd vmb ein halbs phunt phenning wienner mu^enzze - dem beschaiden manne Ruemhartten dem Grozzen vnd frawen Elspeten seiner hawsfrawen - Dorumb so geben wir in den brief - versigilten mit des vorgenanten Pergmaisters Insigel Vlreichs von Rust vnd mit des erbern manns insigel Gorgeins bey dem tor - dar geben ist drewczehn hundert iar dar nach in dem drew vnd Sybenczigistem Jare an Sand Pawls Abend, als er bechert ist.

Source Fulltext: ZEIBIG, Klosterneuburg (=FRA II/10, Wien 1857) S. 450-451