Ich Weykhart der Stayner vnd ich Anna sein hausvrow vnd all vnser Erben Wir vergehen - daz wir - recht vnd redleich verchauft haben den Erwirdigen Geistleichen herren Probst Cholman ze Newnburg vnd dem Convent gemain daselbens - vnsers rechten aygens den Wasen daz Purchstal gelegen ze Aczenprukk vnd den hof gelegen vnder demselben Wasen vnd den Weyer vnd die Au, daz dohaizzet in dem Reyndlein, vnd drew virtail an der vogtey der Pharrchirichen ze heyligenaich - vnd fumf phunt vnd Sechs vnd sybenczig phennig wiener mu^enzz geltes gelegen ze Aczenprukk auf gestiften behausten Gu^etern, vnd vierzehen schilling vnd achczehen phennig geltes auf vberlent vnd auf Purchrecht gelegen daselbens ze Aczenprukk vnd ze Tulln in der Stat vnd vmb die Stat, vnd Sybenczig Jeuch Akchers gelegen ze Aczenprukk vnd ains vnd dreizzig tagwerich wismad‚ auch gelegen daselbens vnd die Wayd vnd zwen Chrawtgarten daselbens - vnd vnsern weingarten gelegen ze Weinczu^erl, der Purchrecht ist von den egenanten herren von Neunburch, dem man alle iar davon dient drey phennig ze purchrecht vnd vnsern weingarten gelegen an der Ru^ewdnik, davon man alle iar dient in Weikharts hof ze Vte\elndorf zwelif phennig ze Purchrecht - Darzu haben wir in ze chauffen gegeben daz Zehentel, das wir gehabt haben daselbens ze Aczenprukk auf den Newraw\eten in dem Elber, daz vnser lehen gewesen ist von dem Byschof ze Pazzaw - vmb sechschalb hundert phunt wiener phennig - Dar vber geben wir in den brief - versigilten mit mein - anhangundem Insigel vnd mit meiner Sweger Insigil, Hainreichs vnd Albers gebru^eder von Aczenprukk, mein egenanten Annen vettern, vnd mit meins Oheims insigil, hern Maricharts von Tyrnstain vnd mit herrn hannsen Insigil, des Toczenpekchen - der geben ist drewczehen hundert iar darnach in dem Newn vnd Sybenczgistem iar des nechsten Mantags nach Mittervasten.

Source Fulltext: ZEIBIG, Klosterneuburg (=FRA II/10, Wien 1857) S. 478