Vrbanus Episcopus servus servorum Dei dilectis filiis Garstensi et Sitastensi Abbatibus, Salzpurgensi et S. Floriani Praepositis salutem et Apostolicam benedictionem. Cum nostris fuisset olim auribus intimatum, quod dilectus filius noster Abbas S. Georgii in Abbatem Chremis Monasterii esset electus, quia per impressionem quorundam laicorum dicebatur inductus et quaedam alia proponebantur contra electionem ipsius, de consilio fratrum nostrorurn eandem electionem duximus irritandam et vobis, filii Praepositi, super ordinatione ipsius Coenobii litteras curavimus Apostolicas destinare. Verum quia fratres praefati Coenobii eundem Abbatem voluntate communi dicuntur denuo elegisse, timentes, ne in electione ipsa fuerit facta violentia vel aliud, quod Canonicis obviet institutis, cognitionem ejusdem negotii vobis duximus committendam discretioni vestrae per Apostolica scripta mandantes, quatenus locum illum pariter accedentes inquiratis, quae circa electionem ipsam fuerint inquirenda, et si eam Canonice et absque pravitate vel impressione aliorum factam noveritis, nullius contradictione vel appellatione obstante ratam decernatis babendam et praecipiatis Abbati, ut auctoritate nostra recipiat administrationem Coenobii memorati Monasterio priore dimisso, proviso tamen, quod in adventu suo Monasterium, quod reliquit, non aggravet auferendo bona ipsius. Injungatis etiam fratribus ejusdem Coenobii, ut alium provideant sibi Abbatem. Mutationem autem sic fieri debere mandamus, si utilius Cremisi Monasterio quam alteri per eum videritis providendum.

Source Fulltext: OÖUB 2 (Wien 1856) S. 404-405