In nomine sanctae et Individuae Trinitatis. Ego Liupoldus Dei gratia dux Austriae et Styriae Rudolfo venerabili Abbati Chremsmunstrensi ejusque successoribus in perpetuum. Inter alia, quae a nobis in transactionibus geruntur, legitimis ea praecipue litterarum indicijs liganda seu stabilienda ac posterorum memoriae commendanda duximus, in quibus Ecclesiarum pacem ac servorum Christi quietem decernendo studium pietatis impenderimus. Praesentibus igitur atque futuris Christi fidelibus hujus paginae testimonio declaramus, quod nos Ecclesiam Chremsmonasteriensem a seculari judicum exactione longis a retro temporibus enormiter laesam toto studij nostri conamine interposito ab ipsorom judicum saecularium potestate hoc modo liberavimus et absolvimus, Videlicet quod jam dicta Ecclesia Ortolfo de Volchenstorf ministeriali nostro judici provinciae, in qua eadem Ecclesia sita est, quadringentas libras publicae monetae nobis mediantibus persolvit et idem Ortolfus omne jus, quod in prsedijs et in hominibus ejusdem Ecclesia; ratione jurisdictionis saecularis habebat, Ottoni tum Advocato Ratisponensi et ille nobis uterque manu ad manum resignavit. Sane quia contractus iste ad proventum Ecclesiae inter nos et ipsum Abbatem in Dominica, qua cantatur Esto mihi, in castro nostro Styrae est celebratus praesentibus Praelatis nostrae ditionis et in praesentia Diepoldi Marchionis de Vochburch, Baronum quoque seu Ministerialium nostrorum, nos praenominatam Ecclesiam ab omni saecularis jurisdictionis vinculo pronunciamus prorsus absolutam. Volentes igitur eandem Ecclesiam plena pace et libertate gaudere omnes justitias et noxietates, quibus saeculari jurisdictioni prius erat obnoxia, glorioso Christi Martyri Agapito pro aeterna remuneratione per oblationem gladij delegando contulimus. Unde decernimus, ut ab hac die nostrae constitutionis in antea nulli unquam saecularium judicum liceat alicujus placitationis formam in praediis Ecclesise exercere nec homines ipsius Coenobij sive colonos in praedijs Ecclesiae sive ministeriales sire proprios sive censuales ad standum suo judicio compellere nec de negotiationibus neque de vectionibus venalium suorum aliquid ab eis exigere. Volumus enim, ut tam ipsius Ecclesiae praedia quam omnes causae, quae in ipsis emerserint, ab omni jurisdictione saeculari tam integre sint exempta, ut de ipsis soli Abbati et ejus Officialibus liecat cognoscere et de cognitis diffinire. Vt autem hujusmodi praerogativa Ecclesiae Chremsmunstrensi a nobis ob remedium animae nostrae ac parentum nostrorum eidem loco indulta tutior perseveret et inviolabiliter conservetur, placuit nobis juxta petitionem Abbatis, ut ab ipso persona, quam sibi viderit congruam vel idoneam, a nobis postuletur, quae voluntate et instructione Abbatis vel officialium suorum justitiam eis exigat et contra omnes injurias et violentias auctoritate a nobis accepta fideliter eos defendat. Et ne diuturnitas temporum ulli talium possit in praejudicium Ecclesiae suffragari, liceat Abbati eamdem personam singulis annis vel ante anni terminum, si voluerit, mutare. Illis autem, quibus nos secundum praedicti petitionem Abbatis praemissorum executionem mandaverimus, hanc formam servare debent, ut in praedijs et bonis Ecclesiae fures non capiant sed sicubi fures notorie devicti fuerint, vel deprehensi, praecones Abbatis illos absque omni laesione Ecclesiae tantum, sicut cingulo clauduntur, ipsis assignent. Praeterea si quispiam in exhibenda Ecclesiae justitia rebellis extiterit, talis a praedicto exsecutore coerceatur, secundum quod Abbas et ejus officiales sibi indixerint faciendum et si per se vel per suos vel etiam per homines Ecclesiae id facere non potuerit, auxiliarios sibi de nostris, quibus ipse causam indicaverit, assumendos esse mandamus. Noverit ergo nostra posteritas neque per infeodationem neque per aliud quodcunque genus alienationis hujus exemptionis privilegium infringi posse vel aliquatenus violari. Quodsi in ejus praejudicium aliquo praecipiti consilio, quod absit, ab heredibus nostris infeodatio de facto contigerit, irritam eam et omni robore vacuam censemus omnino non tenere; Sed siquis talis feodi praetextu in damna Ecclesiae manum miserit, damnum recompenset in quadruplum et quasi eleemosynae nostrae violator in Deum et in animam nostram reum se esse cognoscat. Ad horum autem omnium evidentiam, quae hujus privilegij nostri tenor continet, et nostrae diffinitionis stabilitatem perpetuam paginam praesentem autentici sigilli nostri impressione insignimus robore perenni valituram cum subscriptione, qui primae transactioni apud styram interfuerunt: Gotfridus Abbas Admontensis, Chunradus Abbas Garstensis, Ditmarus Abbas Sittanstetensis, Dytpoldus Marchio de Vohburch, Otto advocatus de Lengebach, Otto de Ror, Gundaker de Styr, 0taker Priuhauen, Imbrico de Steinbach. Deinde vocato Abbate ad novam civitatem in publico placito nostro hoc ipsum factum nostrum declarantes, plures ei testes adhibuimus, Qui sunt Liutoldus Comes de Hardek, Vlricus Comes de Chlam, Herandus de Wildonia et testes alij quam plurimi in privilegio annotati. Datum apud Admunt Idus Maij anno Incarnationis Domini MCCXVII. Indictione V. Pontificatus vero Domini Honorij Papae anno primo, Feliciter Amen.

Source Fulltext: OÖUB 2 (Wien 1856) S. 589-591