Gregorius episcopus seruus seruorum dei. Dilectis filiis abbati et Conuentui in Cremsmunster ordinis sancti Benedicti Salutem et apostolicam benedictionem. Sacrosancta Romana ecclesia deuotos et humiles filios ex assuete pietatis officio propensius diligere consueuit, et ne prauorum hominum molestiis agitentur, eos tamquam pia mater sue protectionis munimine confouere. Quapropter dilecti in domino filii uestris iustis precibus inclinati personas uestras et locum, in quo diuino estis obsequio mancipati, cum omnibus bonis, que impresentiarum rationabiliter possidet aut in futurum iustis modis prestante domino poterit adipisci, sub beati Petri et nostra protectione suscipimus Specialiter autem ecclesiam de Petenbach cum decimis et aliis pertinentiis suis, quam Venerabilis frater noster. Patauiensis episcopus loci diocesanus capituli sui accedente consensu monasterio uestro concessit, et de monte sancti martini et de mutarn predia et alia bona uestra, sicut ea omnia iuste ac pacifice possidetis, uobis et per uos eidem monasterio auctoritate apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre protectionis et confirmationis infringere uel ei ausu temerario contraire. Siquis autem hec attemptare presumpserit indignationem omnipotentis dei et beatorum Petri et Pauli apostolorum eius se nouerit incursurum. Datum Lateranis jj. Nonas Aprilis, Pontificatus nostri anno Quarto.

Source Fulltext: OÖUB 2 (Wien 1856) S. 684-685