Alexander episcopus seruus seruorum dei Dilectis filijs ... Abbati et Conventui Monasterii de Cremismunster ordinis sancti Benedicti Patauiensis diocesis Salutem et apostolicam benedictionem. Cum a nobis petitur, quod iustum est et honestum, tam uigor equitatis quam ordo exigit rationis, ut id per sollicitudinem officij nostri ad debitum perducatur effectum. Sane petitio uestra nobis exhibita continebat, quod bone memorie Rudgerus Patauiensis Episcopus Monasterij uestri paupertatem attendens parrochialem ecclesiam de Weizchirchen Patauiensis diocesis, in qua ius patronatus habetis, uobis Capituli Patauiensis ad id accedente consensu in usus proprios deputavit, reseruata perpetuo Vicario in ea seruituro de ipsius ecclesie prouentibus congrua portione, ex qua potest commode sustentari ac Episcopalia, Archidiaconalia et alia consueta onera supportare, prout in litteris inde confectis sigillatis sigillo ipsius Episcopi plenius dicitur contineri. Nos itaque uestris supplicationibus inclinati, quod super hoc prouide factum est, ratum et firmum habentes, id auctoritate apostolica confirmamus et presentis scripti patrocinio communimus. Nulli ergo omnino hominum liceat, hanc paginam nostre confirmationis infringere uel ei ausu temerario contraire. Siquis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum Anagnie kalendis Februarij, Pontificatus nostri Anno Quinto.

Source Fulltext: OÖUB 3 (Wien 1862) S. 575-576, Nr. XVIII des Anhanges