Venerabilj in Christo patri et domino Bertholdo abbati Monasterij Chremsmvnstrensis et eiusdem Ecclesie religioso Conuentuj Hermannus dei gratia abbas in Altah inferiori et Conuentus ibidem fraternam in domino karitatem. Cum ab unius parentele principio nostri et uestri monasteriorum propago descenderit, dignum est, ut moderna successio seruet et renouet antique sue originis vnitatem. Quare fraternitatem, que inter nos olim fuisse dicitur, si tamen uobis placet, renouandam duximus in hunc modum, quod singulis annis post dominicam, qua cantatur: Domine, in tua misericordia, proxima uacante feria generaliter pro omnibus defunctis in uestro monasterio aput nos et pro nostris defunctis in uestro pulsatis campanis officium unum fiat, uidelit uigilie exintegro, ut est moris, et in mane missa una publice in Conuentu. Preterea ad unam priuatam missam ipso die singuli prespiteri teneantur, alij inferiorum ordinum litterati, Quinquaginta psalmos dicant et qui litteras nesciunt, tociens Pater noster; Idem quoque per omnia fiet, quociens uobis alicuius uestrum sev uobis alicuius nostrum fuerit obitus nunciatus. Supradictis autem de communi consensu et beneplacito adicimus, quod reuerentie vestre venerabilis pater et domine Bertholde nunc abbas nos ad hoc singulariter obligamus, ut, cum nostro collegio uester transitus innotuerit, tantum pro uobis facere teneamur in tricenario et aliis, quantum pro uno prelatorum nostrorum defuncto facere consueuimus, ut et uos et vester Conuentus ad idem teneamini domino et patri Hermanno nostro nunc abbati, cum suus obitus fraternitati uestre fuerit nunciatus, Sperantes, quod hec spiritualis fraternitas perpetua fiat inter nos confederatio nostras connectens ecclesias indissolubili uinculo karitatis. Datum in Altah Anno domini Millesimo, Ducentesimo, Quinquagesimo, Nono, XI. kalend. Julij.

Source Fulltext: OÖUB 3 (Wien 1862) S. 577-578, Nr. XXI des Anhanges