In nomine domini Amen. Qvia variacio temporum noticie causam nouercatur, legum vvlt scrupulus, seriem geste rei fidelis scripti pagina certoque testimonio sollerter ac fideliter confirmare. Ego itaque Ernestus miles et Hiltkardis de Lapide ad noticiam uniuersorum cupimus peruenire et presentibus protestamur, quod ob remedium animarum nostrarum et predecessorum nostrorum ecclesie sancti Agapiti in Chremsmvnster tradimus et assignamus ad officium Infirmarie hos redditus percipere propter deum: vnum feodum in der Swerze apud Petenbach, quod soluit tres solidos denariorum in Natiuitate beate virginis, exceptis presentacionibus festorum, quod vvlgariter dicitur Waeisat. Item predium retro pomerium, in quo residebamus, quod similiter persoluit III. solidos denariorum. Item decimam eiusdem predii, que ad minus ad LX denarios estimatur. Item X. iugera lignorum super Schachen. Et hec contradidimus tali modo, ut singulis annis in anniuersario nostro, hoc est II. nonas Septembris, a fratribus ecclesie communiter nostrarum fiat commemoracio animarum, et vt dictus magister Infirmarie ob hoc predictis fratribus de premissis redditibus consolacionem hanc faciat illo die, videlicet vt cuilibet fratrum unus potus vini et vnus albus panis cum vno bono ferculo ministretur, hoc addito et adiuncto, ut, si magister Infirmarie vel dominus abbas, qui pro tempore fuerit, predictos redditus ab ecclesia per feodum vel alio modo voluerit alienare, quod extunc ipsi redditus ad heredes nostros proximiores sine mora saluaque sit eis questio repetendi. In cuius rei testimonium et munimen testes infra scriptos duximus annotandos: Dominus Merboto de O^ed, Dominus Chvnradus de Rotenpaumgarten, Heinricus et Otto de Ahlyten, Hertwicus Dens, Otto de Chv^operch, Heinricus de Egendorf, Otto Pavzwekk, Rvgerus in Ripa, Chvnradus Pernsvn Comes, Catenarius, Richerus de Edelspach, Johannes de Achlyten, Otto de Chremsdorf, Nezzelpekh, Chvnradus iuuenis de Aschperch, Alramus de Lavterbach, Ortolfus notarius. Actum et datum anno domini M. CC. LX. III.

Source Fulltext: OÖUB 3 (Wien 1862) S. 313, Nr. 336