Rudolfus Dei gracia Romanorum Rex semper augustus Omnibus Imperpetuum. Ad soliditatem throni Regalis conferre dinoscitur, si ad religiosas personas et loca diuino cultui deputata consideracio benigna porigitur, et ad ipsorum libertates et gracias conseruandas graciosa proteccio principis inuenitur. Nouerint igitur vniuersi tam posteri quam presentes, quod accedens ad nostram presenciam honorabilis Fridericus abbas de Chremsmunster quoddam priuilegium inclite Recordacionis Friderici quondam Romanorum Imperatoris augusti predecessoris nostri nobis exhibuit, petens humiliter ac deuote, ut ipsum priuilegium et quicquid continetur in ipso, confirmare de nostra gracia dignaremur. Cuius tenor est talis: (Es folgt die Urkunde dat. Passau am 14. Juni 1217. Siehe OÖUB, Band 2, Nr. 398.). Nos igitur, qui ex assumpti Regiminis debito ecclesiarum precipue et regularium personarum tranquilitati et comodo volumus et tenemur prospicere et libertates ipsis indultas fauorabiliter conseruare, deuotis abbatis predicti precibus inclinati, supra scriptum priuilegium et omnia in ipso contenta auctoritate presentis decreti liberaliter confirmamus, innouamus et Sibi ac suo monasterio huius scripti patrocinio imperpetuum comunimus. Et quia quondam heinricus de Grauenstayn et hernidus de Ort in Illustris quondam Friderici, ducis austrie et Styrie presencia constitui, aduocaciis, exaccionibus et aliis Juribus quibuscunque, que ipsis in possessionibus antedicti Monasterii competebant uel competere uidebantur, renunciauerunt libere et cesserunt, sicut in prefati ducis Instrumentis uidimus contineri: Nos cessionem et renunciacionem huiusmodi approbantes, ipsam memorato abbati et suo monasterio de beneficentia Regia Imperpetuum confirmamus. Sub interminacione igitur gracie nostre districcius inhibemus, ne quis Imperii fidelium, cuiuscunque status aut condicionis existat, contra premissa omnia aut aliqua premissorum in aliquo venire audeat uel presumat, Quod qui fecerit, grauem nostre Maiestatis offensam se nouerit incursurum. In quorum omnium testimonium et perpetui roboris firmitatem, presentem paginam exinde conscribi et Maiestatis nostre Sigillo iussimus comuniri. Testes huius rei sunt venerabiles Petrus Patauiensis et Johannes Gurcensis Ecclesiarum Episcopi, Illustris albertus dux Saxonie, Meinhardus tyrolensis, Fridericus Burchgrauius de Nurenberch, hermannus de hennenberch, Burcardus de hohenberch, hugo de Werdenberch et Eberhardus de Catzenelnbogen Comites, Wernhardus de Schowenberch, Otto de Lichtinstein aliique quam plures. Signum domini Rudolfi Romanorum Regis Inuictissimi. Datum per manum Magistri Gotfridi Regalis aule prothonotarii anno domini Millesimo ducentesimo Septuagesimo Nono, Indiccione VIII. Regni vero nostri anno Septimo. Actum apud Linzam II. Nonas Nouembris anno et Indiccione prescriptis.

Source Fulltext: OÖUB 3 (Wien 1862) S. 510-511, Nr. 548