Ich Fridreich pharrer ze hall. vergich offenleich an dem brief allen den die in an sehent ho^erent oder lesent das Reicher der Sinczendorfer hainreichs sun von Sinczendorf dem got gnad. hat geschaft mir vnd der pharr ze hall. vnd allen den pharrern die nach mir ewikleich chu^enftig sind ain halb phunt phenning wienner mu^enss auf ainer Wis die do leyt pey der Riczenhub. Vnd hat auch von alter in die Riczenhu^eb geho^ert, die man mir vnd wer pharrer do ist oder nach mir chünftig wirt dienn. vnd geben sol. alle jar des nahsten mitichen nach Sand Jo^ergen tag, Also beschaidenleich. das ich an demselben mitichen sol haben oder wer pharrer do ist des abentz ain vigili vnd des morgens drey mess. vnd ob ich des nicht enta^et. vnd das liess vor fra^euel oder vor vbermu^et vnd ich es nicht wider ta^et darnach vnd ich gemant wurd von seinen erben oder von andern seinen frewnten inder aht tagen, so sol man das vorgenant halb phunt phenning an demselben jar ze hall der pharr in das lieht an allen chrieg vnd wider red. Wa^er aber das mich ehaftew not irret so pin ich dhains punts punden noch veruallen noch ander pha^erra^er die nach mir chu^enftig sind, Vnd das die wandlung der vorgeschriben sach also sta^et vnd vnuerchert bleib. gib ich obgenanter Fridreich den offenn brief versigelt mit meinem anhangunden Jnsigel. Der geben ist nach Christi gepu^erd drewtzehen hundert jar darnach in dem achtzigisten jar des nachsten Samtztage nach Sand Niclas tag. Diser sach vnd tayding sind gezeugen helmhart der Anhanger vnd Seybot der Sinczendorfer vnd ander pider la^ewt den die sach chunt vnd gewissen ist.

Source Fulltext: OÖUB 9 (Wien 1906) S. 903-904