Ich Wernhart von Achleiten vnd mein hausfraw Elspet vergehen offenbar an dem prief, daz wier das guet ze Rugenhaim in Staineinchircher pfarr gechauft haben von den Erben uns paiden ze leipgeding, nach vnserm to^ed schol iz dem Gotzhaus ze Chremsmunster ledig sein und waz iz über di rechten vadrung nach der umsetzer rat getragen mag da Schol ewichleich unser Jerleichtag mit Messen und mit Vigili van begangen werden nach des Appts rat in welch Ampt er uns daz guet schaffen haizzet. Wier verpinten uns auch alle di recht, wi di genant sein, ze dullten von dem vorgenanten guet alle gentzleich alls chain pauman, der iz je inn gehabt hat, wier schullen auch chainen wein da nicht schenchen nuer mit des Appts oder seins Richter urlaub. all dis gotzhauses armleut schulln von uns, von unsern vreunten und chnechten ungelaidigt beleiben. Geschaech iz dar uber, daz iz zwen pider mann gesagen muchten, so scholl sich alls recht, daz wier an dem vorgenanten guet haben, vervallen haben, ob der schad auz dem selben guet geschieht an all widerret, Daz di red stet und unverchert beleib, gib ich Wernhart von Achleiten disen prief versigelten mit meinem anhangundem insigel. Der prief ist geben do nach Christ gepurt vergangen warn Dreuzehenhundert Jar darnach in dem dreuuntreizkisten Jar an sand Gilgen tag.

Source Fulltext: OÖUB 6 (Wien 1872) S. 104f., Nr. 94