Ich Lybaw^en von Tru^echsen und ich Hertneid von Truchsen Wier vergehen unt tun chunt mit diesem Prief allen den, di in sehent ho^erent oder lesent, Daz wir mit gu^etem willen und wol bedacht und auch zu der zeit und wir iz wol getun mo^echten, verchauft haben unser Haus ze Pernstain, daz unser rechtz Erb und aigen ist, Herrn Eberharten von Waltse zu den zeiten Hauptman ob der Ens und allen sein Erben um fu^enfthalb Tausent pfunt alter wienner pfenning mit allen den rechten und wir in dem Lant haben an Purchstalen, an Vo^ersten, an Wismat, an Vogtay, an aigen Leuten, an Vogtleuten, an zinsleuten mit aigen und mit lehen, als wir iz in nutz und in gewer gehabt haben, iz sei in urbar oder verlehentz, versucht oder unversucht, ze Holtz und ze Veld, wie daz genant ist, und sein auch des sein Scherm und sein gewer und seiner Erben nach Lantes recht. Und geben im auch dar uber disen Prief ze eim ewigen urchund, bestaet und gevestent mit unser peder anhangunden Insigeln. Der Prief ist geben du von Christ gepu^erd dergangen waren Dreuzehen hundert Jar dar nach in dem Siben und Dreizkistem Jar an sand Mathias abent.

Source Fulltext: OÖUB 6 (Wien 1872) S. 227, Nr. 223