Ich Hanns Fluschart ich Mathes sein pruder wir veriehen vnd tun kund mit dem offen brif, das wir mit gutem willen nach rat erber leute frewntlich vnd liebleich vberain chomen sein mit vnsern zwain swestern frawn Elspeten und Barbara von des hofs wegen genant zu Tampach gelegen in Sippachceller pfarr, der eriblehn ist von dem gotzhaus Kremsmünster vnd den ich von dem erwirdigen herren abt Mertten daselbs mir vnd allen meinen geswistreydn alln von vnserr lieben muem frawn Affren selig Chunrad Muchler witiben vnd Niclas Fluscharts swester anerstarben ist vnd der auch alle jar jerleich achtzehen schilling Wienner phenning geltz ist, also das ich vorgenanter Hanns Fluschart mich verpunden han vnd gelob auch mit dem brif, das ich desselben hofs mir vnd alln meinen geswistreydn getrewr lehentrager sein sol vnd wil, an geuerde vnd sulln auch wir den hof mit allen eren vnd rechten mit einander haben vnd neyessen, als er von vnsrer egenanten muem seliger an vns geualn ist vnd als si den genozzen hat, also das mein paid swester von dem hof jerlich auf sand Merteins tag haben vnd emphahen sullen newn schilling wienner phenning gelts an allen irrsall, dann die vberigen newn schilling geltz sol ich vnd mein pruder Mathes von dem egenanten hof auch jerleich auf die Weinachte haben vnd emphahen an alle irrunge in der beschaiden, wenn das ist, das vnser zwen prüder, die zu diser zeit pei dem land nicht gebesen sind, zu land choment, so sullen wir in iren tail dinsts, der sew diselben vergangen zeit an gepurt hat, furderlich erstatten vnd widerkeren an alle widerred vnd sulln si dann den hof mit seinn nutzen geleich mit vns haben vnd nyessen. Welches auch vnder vns geswistreyden an erben mit tod abging, desselben tail sol erben vnd geualln auf die andern geswistret. Wer aber, welches geswistred seins tails lenger nicht haben wolt oder mocht, den sol es den andern geswistred frewntlich für ander leute wideruaren lassen vnd nach demselben gelostem tail suln dann die andern geswistred fürbas nichts mer ze sprechen noch ze vordern haben, es sey dann, ob dasselb geswistret an erben abging, so sol es hin wider erben auf sein geswistred. Vnd wann ich obgenanter Hanns vnd Mathes di Fluscharten zu diser zeit insigels nicht hetten, daruber zu warem vrchund geben wir den brif versigelten mit des obgenanten vnsers gnadigen lehenherren herren abbt Mertten ze Kremsmünster insigel, das er durch unserr vleissigen pet willn an den brief gehangen hat im vnd sein nachkomen an schaden vnd vnuertzigen seins gotzhaus monschaft, dartzu haben wir gepeten den erbern Hainrich den Getringer, das der sach zeug ist mit seim insigel im vnd sein erben an schaden, vnder di sigell wir vns verpunden haben mit vnsern trewn an geuer allz daz halten, das an dem brif verschriben stet, geben an vnser Frawntag zu Liechtmezz nach Kristi gepurd dreutzehundert jar vnd in dem fumfvndnewntzigisten jare.

Source Fulltext: OÖUB 11 (Wien 1983) S. 360-361