Ich Wernhart von Sewsenekk diezeit phleger zu Sewsenekk vnd ich Wolfgang Humbrechtzrieder die zeit richter des gotzhaus zu Chremsmünster wir veriehen mit dem brif vmb den hindergang, als der erwirdig gaistleich herre her Mertt abbt des gotzhaus zu Chremsmünster vnd der conuent daselbs an aim tail vnd der erber briester her Wilhalm von Pechlarn am andern tail aller stözz krieg vnd misshelung, di si von der chirichen begen Kempnaten aller sach vntz auf hewtigen tag miteinander gehabt habent, hinder vns gangen ||
habent, also waz wir vmb dieselben all ir chrig vnd stözz zwischen in sprechen vnd berichtung tun, da wellen si vnuuerrucht vnd gentzlich pei beleiben vngeuerlich, allz wir des ir paider hindergang brif haben. Sprechen wir von erst, das alle die krig zerung vnd scheden, allz die paid tail von der chirichen begen Kempnaten gehabt habent vnd darauf gangen sind, wie sich daz alles gefuget hatt, gar vnd gentzlich gen einander ab (sind), daz ain tail dem andern darumb hinfür chain zusprach noch vordrung weder mit geistleichem noch weltleichem rechten noch in chainen widern sachen nicht mer haben noch tun schol, vnd sprechen dem vorgenanten hern Wilhalm die chirichen zu Kempnaten, daz man in der von des gotzhaus begen zu Kremsmünster weltigen schol am andern tag, alz der brief geben ist, vnd schol die mit ir zugehorung hinfur inne haben vnd besitzen vnd schol mein herre zu Kremsmunster mit seim anwalt di egenannte kirichen mit alln nutzen besitzen vnd inne haben vntz auf sand Jerigentag schierest kunftig vngeueret vnd schol hern Wilhalm dawider awsrichten vnd geben zwaintzig phunt wienner phenning nach des geltbriefs sag, den er von im dorrvmb hatt. Auch sprechen wir, daz all die nutz, die von der chirichen zu Kempnaten vnntz auf hewtigen tag geuallen sind, dem gotzhaus zu Chremsmunster an all zuspruch vnd irrung beleiben schulln. Wir sprechen auch vmb all die zehent, die daz gotzhaus zu Kremsmunster in der pfarr zu Kempnaten hatt, die weylent her Hanns Gruber pfarrer daselbs von dem gotzhaus Kremsmunster in bestantz weis inne gehabt hat, allz die des gotzhaus vrbarpuch weysent vnd wie di mit namen hienach verschriben vnd yetz ligund sind, allz die zu des gotzhaus hof zu Chremscell vormals gefezzent vnd gefürt warden sind, daz di dem egenanten gotzhaus zu Kremsmunster hinfür ewichleich an allen krig vnd irrsal vnuerrucht beleiben schullen, also daz der obgenant her Wilhalm vnd sein vicarii oder wenn er di chirichen awswechselt, chain zuspruch recht noch vordrung gen dem gotzhaus zu Chremsmunster vnd gegen denselben zehenten allen darvmb hin für nymmer haben schullen vnd welln weder mit gaistleichen noch weltleichem rechten noch in chain andern begen an allz geuer. So sind daz di zehent auf den gütern hienach verschriben: von erst auf der Nydern Grub vnd auf der Obern Grub vnder der Chrems gelegen, zu Öd zwai haus, Wäffleinstorff ain haus, Teufelshub ain haus, Rutenstain ain haus, zu Haid auf drein hewsern daz drittail, in Zawn ain haus, di Verloren Hub pei Piberpach, dacz dem Moker ain haus, im Pach drew haus, zu Jagarn auf zwain hewsern daz trittail, Wolfsekk ain haus, zu Nöting zwai haus, zu Sturberg zwai haus, zu Pelndorf ain haus auf dem Zwigelhof, Nidern Hagenaw von Obern Hagenaw, Wolfstain hof halber, zu Chepping zwai haus, zu Haid fümff haus, Virtzelperg halbs, zu Dietreichstorf ain haus vnd auf dem Pabenhof auf dem Perig dacz Ortolffen vnd ze Vogelperg auf der Wurtzelhub zu Gleichsen hub das tritt veld, zu Chrotendorf daz Nyder Haus auf der Widem halber zehent, zu Lauerstorf daselbs auf der Haid vir haus, Chaltenhub, Haselperg anderthalb haus, auf dem Zawn zwai haus, daselbs auf dem Puhel ain haus datz dem Grillmair, Ödenhub daselbs datz dem Stainhaus daz trittail, Greulhub Phutzenhub zwai haus, zu Loch ains haus, zu Winden dritthalb haus, Swenting zu Graben ain haus, zu Erleath zwai haus, datz Chremscell vir haus, zu Purchk siben haus, zu Haibrechting zwai haus, datz Stephan in der Grub, datz Zehenthof zu Lettendorf halbs, ze Parsenprunn zu Strazz zwai haus, zu Pluemling ains haus, in der Grub ain haus, zu Pirichod Purkchartsperg halbs, zu Loterperg das trittail, auf dem Herrantzlehen Gumppenhub zu Vischn halbs, zu Newnhofen der purkchzehent, dacz dem Tastel in der Leyten zu Gereindorf sechs luzz, datz dem Smid zu Prantstat ain haus, Pretschelichlehen pei Newnhofen, dacz Tyemdorf auf ain veld, zu Henning auf aim veld, datz dem Roten im Holtz ain lehen, datz dem Raidmair in der Öd, Riedluz pei Haselperg, zu Chnutlingen ain haus. Wir sprechen auch, welher tail des Spruchs awsging vnd nicht hielt allz daz, sa an dem brif begriffn ist, derselb tail ist voraws von alln seinen rechten vnd ist dartzu ververfallen vnserm gaistlichem vater dem Pabst von Rom zwai hundert guldein in sein chamer vnd dem hochwirdigen gaistlichem fürsten vnserm gnadign herren dem Bischof von Pazzaw hundert guldein vnd vns Spruchleuten hundert guldein. Vnd des Spruchs ze vrchund geben wir obgenant Wernhart von Sewsenekk vnd Wolfgang Hvmbrechtzrieder den brif besigelten mit vnsern paiden angehanngen insigeln, geben an Eritag nach sand Jacobstag nach Kristi gepurt dreutzehenhundert jar darnach in dem achtvndnewntzigisten jare.

Source Fulltext: OÖUB 11 (Wien 1983) S. 718-721