Ich Gvndaker von Storchenberk vergich an disem prief allen den, di in sehent oder horent lesen, di nv sint vnd noh chvnftic werdent, daz ich mins průder Rvegers pork pin für zwelf phvnt phenning wienner mvnnz gein vlrichen von Prvnnhaime also, daz in min pruder sol cze den nasten Svnwenten der vorgenanten phenning weren. geschaeh des niht, so sol er im dar nah iner vier tagen ein Sa^etzvng setzen zwelf Schilling gulte nach Chunrats von Sant Jorigen rat vnd helmartes von prvnhaime vnd wurde daz allez verzikte, so sol ich gvndaker nah demselben gelubde iner acht tagen datz Lintz in varen hintz hainrichen an dem vrvar vnd sol nimmer vz komen, ir werd vlrich siner phenning ver richte. Waer aber, daz mich icht savmet, so sol miner rittermezzigen chnecht einer in varen in miner stat vnd sol laisten also vor gelu^ebt ist vnd ist, daz got in der weil vber mich gebivtet, daz ich niht enbin, so sol min pruder Rueger allez daz gelubde laisten, daz ih gelvbt han vnd sol min hausfrowe vnd minev kint niht damit ze schaffen haben vnd ist der oft genant vlrich in dem lande ze der weil niht, so sol ich Gvndaker Chvnrat von Sant Jorigen div vorgenannten gelubd laisten an siner stat. sturbe vlrich in der zit, so sol ich sinem pruder helmarten div oft genanten gelubd alliv laisten. daz div red staet belibe vnd vnuercheret, dar vber gib ich im disen prief versigelt mit vnser paider Insigel. des sint gezivk her ditmar von aistershaime, heinrich vnd dietmar sin vetern, Chvnrat von Sant Jorigen, Wernher vnd vlrich sin Vetern, Vlrich von Anhang, Helmart vnd Vlrich sin sven, Alram von Wilperch, Wernher Zaizze, Ortolf von tanpah. Der prief ist gegeben do von Christes geburd waren Tovsent jar drivhundert jar vnd in dem sibenten jar An Sant Ambrosentag.

Source Fulltext: OÖUB 4 (Wien 1867) S. 522-523, Nr. 561