Ich Ulreich der Trautman von Rechperch und ich Katrey sein hausvrow und alle unser erben verjechen, daz uns die würdigen geystleichen herrn abpt Johans die zeit ze Lambach und der convent doselbs mit verainden rat und mit wolbedachtem mut zu den zeiten do sew ez wol getun machten recht und redleich gebent habent irs gotzhaus weingarten ledigleichen mit allen nutzen, der gelegen ist ze Ernreichstal des ain jeuch ist mitt solher beschaidenhaid, daz wir alle jar dovon gebent sullen dem erbern wirdigen herrn abpt Johansen von Lambach und dem convent doselb in iren hof datz Chrems acht wienner pfennig ze purchrecht an sand Michels tag, und sullen in und iren gotzhaus fürbaz alle jar dovon geben und dienen jarleichen sechs schilling wienner pfennig ze dinst in iren hof ze Chrems an sant Merten tag, in allem dem rechten und nutzen alz man andern dienst dient in dem lant ze Osterrich. Ta^et wir da^es nicht so vervelt sich wandel dorauf alz purchrechts recht ist und des landes recht in Osterreich, und wann sew ire versezzen dienst und wandel nicht lenger peyten wellent, so haben sew vollen gewalt daz sew uns notten und pfenten mit dem wein in dem weingarten in der prezz oder wo sew oder ir amptla^eut dorauf chomen mugen, mit der prechvrown (perechvrown) gewalt die zeit priorin ze Minpach oder mit des gerichts an fürbot an chlag und an alz recht, alz lang untz daz sew diensts und wandel gantz und gar gewert gericht werden, und sullen sew des unenkolten bleiben vor allen la^euten. Wir haben auch vollen gewalt den egenanten weingarten ze verseczzen und zu verchauffen und geben wem wir wellent mit allen den rechten di vorgesehriben stent und anders nicht mit irs hofmaisters wizzen ze Chrems in und iren gotzhaus ze Lambach an schaden. Und des ze urchund geb wir in den gegenbirtigen prif versygelten mit der erbern la^eut insigel Otten dez Spornransts die zeit purkgraf ze Rechperch und mit des erbern maus insigel Hermans an der Weghaid puriger und ze den zeiten des ratz in Chrems den ich obgenanter Ulreich Trautman dorumb payd gepeten hab daz sew ireu insigel an den prif gehangen habent zu einem waren zeug in an schaden wann ich selb zu der zeit nicht aygens insigel gehabt han. Der prif ist geben nach Christ gepurd uber dreutzehen hundert jar dornach in dem fümf und sechtzkisten jar an sand Georigen tag.

Source Fulltext: OÖUB 8 (Wien 1883) S. 224f., Nr. 222