Wir Ulreich von Gotes gnaden abpt ze Lambach und der gantz conventt do selben wir verjechen offenbar mit dem gegenburtigen prief, daz wir mit wolbedachtem mut und mit veraindem rat daz lechen ze ObernHoltzhaim gelegen in Swanserpfarre mit allen den nutzen di durch recht darzu gehorend ze holtz ze velde versuecht und unversuecht verlichen haben ze ainem rechten eribrecht Ulreichen des Webers sun von Perngering und seiner hausvrown vron Elspetten und iren erben mit solicher beschaidenhait, daz man uns und unserm gotzhaus jerchlich do von dyenen sol ain halb pfunt alter wienner phening und sechs huener an sand Michels tag und drey schillinge wienner phening ze paustewer an dem prechemtag und zwantzig wienner phening ze voytstewer an sand Georigen tag und anders nicht unverzigen unsers gotzhaus rechten. wir offenn auch wie sich da - (lacuna im Perg., vielleicht: vorgenant gut) - ... verwandelt ez sey mit versetzen oder mit verchauffen wer dann daz guet von uns wil haben der .... - (lacuna) - und sol auch unser hold darauf sein on allen chrieg. dar uber geben wir in den gegenburtigen ... - (lacuna) - mit unsern anhangunden insigeln. daz geschehen ist nach Christes gepurt uber dreutzehenhundert jar - (lacuna) - in dem ainen und sybentzigisten jar an sand Johanns tag ze Ostern.

Source Fulltext: OÖUB 8 (Wien 1883) S. 526, Nr. 531