Ich Chu^enrat von Chershu^eb und mein eleich hawsfraw Agnes vergehen und tu^en kund offenbar mit dem bri^ef allen den er fu^erpracht wi^ert, das die erwi^erdigen geistleichen unser gene^adig lieb herren abbt Symon ze Lambach und sein convent uns und unser paider chinden Ulreichen, Kathrein, Elspethen und Margarethen und allen unsern chinden di^e wi^er paidew hinfu^er mit einander gewinnen, verlihen habent i^er hu^eb, genant di^e Chershu^eb, gelegen in Puchle^ar pharr da wi^er di^e tzeit he^awsleich aufgesessen sein mit alle dem, das durich recht und von alter dartzu^e geho^ert und davon beko^emen mag ze holcz, ze veld, ze wismad, versu^echt und unversu^echt ze unsern und und unsrer benanten chinder lebtagen und nicht lenger jn solicher beschaiden, das wi^er in und dem gotzhaus ze Lambach je^arleich von der benenten hu^eb di^enen und raichen schullen ain schaf waitz, fumftzehen metzen habern ze der czeit, so man in andern i^ern traid di^ent und fumf hu^ener, und an sand Jorigen tag fumftzehen Wyenner phennig ze vogtstewr und des andern di^ensts und vo^edrung wi^e di^e genant sind, so in i^ern urbarpu^ech und registern geschriben stet, schullen wi^er und unser benanten chinder unser lebtag uberhaben sein und dar umb haben wi^er in betzalt und ausgericht ain genantz gelt; wi^er schullen und wellen auch mit unserm obgenanten leibgeding dhain wandlung haben weder mit versetzen noch mit verchauf fen noch mit dhainerlay weys an unsrer abgenanten herschaft hannt und gu^eten willen und in allen dingen geho^ersam sein als ander i^er hinderse^azt, und wann ich obgenanter Chu^enrat und mein benant hawsfraw Agnes und unserew chinder, di^e wir miteinander haben oder kunftikleich gewinnen, abgesterben, das unser nicht mer ist, so ist di^e obgenant hu^eb mit alle dem, das von alter dartzu^e geho^ert und davon bekoemen mag, unsrer obgenanten herschaft und i^erm gotzhaus ze Lambach gantz und gar ledig warden, das dhain unser erib und frewnt, wi^e der genant oder mit uns gesyppt ist, nichts dar gegen ze sprechen hat, weder umb vil noch umb wenig, und was unser eriben und frewnt oder y^emant andrer von unsern oder von i^ern wegen wider das alles das in dem gegenwu^ertigen bri^ef begriffen ist, redten oder te^aten es we^ar mit recht oder an recht geistleich oder werltleich, das hat unser obgenant herschaft alles behalt und gewunnen und wi^er, unser erben und nachkunft alles verlo^ern wo es fuerkumt, ez we^ar dann als vil, ob unser eriben nach unserm und unsern chinder to^ed von unsrer obgenanten herschaft genaden erwerven mochten, das sew fu^er ander le^awt auf der obgenanten hu^eb beliben des hab wi^er vleizzig gepeten und stet dacz i^ern genaden, ob es unser benant herschaft tu^et, und dar umb ze ainer warn und ste^aten u^erchund geben wi^er unsrer obgenanten herschaft und dem gotzhaws ze Lambach den offen bri^ef, versigelt mit der erben weysen Weykcharts des Tru^enten und hansens Oberhayme^ar, di^e tzeit phlege^ar ze Dreatenekk paider anhangunden jnsigeln, di^e sew durich unsrer vleizzigen pet willen an den bri^ef ze tzeugnuss gehangen habent in paiden und allen i^ern eriben an schaden, dar under ich mich obgenanter Chu^enrat, mein hausfraw Agnes, unserew chinder und mit sampt mir uns all unser eriben und nachko^emen verpinden mit unsern trewn in aides weys alles das ste^at ze haben und ze volfu^eren, das in dem bri^ef begriffen ist. Geben nach Christi gebu^erde tausent jar, dar nach in dem vi^erhundertisten jar an sand Florianstag.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 491-493, Nr. 415