Ich Geru^eng von Holczarn, und ich Lynhard von Holczarn gepruder und unser paider hausfraun mit sampt uns unser paider erben, vergehen offenleich mit dem gegenwu^ertigen briff und tu^en ku^end allen den, die in sehent, hornt oder lesent, daz wir mit wolbedachten mu^et czu den czeiten da wi^er es mit recht wol tu^en mochten nach rat und auch mit gu^enst unser nachsten und pesten freund recht und redlich kaufleich cze kauffen haben geben unser lehen cze Lucken, daz unser va^eterleich erib gewesen ist, gelegen in Gu^enskircher pharr, der erbern frawn frawn Margreth, Wernhartes des Ho^efrer sa^eligen wittiben und irem sun Hainreichen, gehorsamer cze Lambach, umb ain gelt, des wi^er von in ganz und gar cze rechten ta^egen an alle schaden gericht und gwert sein und haben in daz ingeantwu^ert au^es unser nu^ecz und gwer in i^er nu^ecz und gwer mit alles ern, nu^eczen und rechten, die dar czu^e gehornt und da von bechomen mu^egen cze holcz, cze veld, cze wismad, besucht und unbesucht, wie daz benant ist, nichtz ausgnomen in dhainerlay weiss, alz es von alter he^er chomen ist, mit des beschaiden, daz man dem erwirdigen goczhaws cze Lambach in die abbttey ja^erleich raichen und di^enen schol cze unser frawn tag czer di^enstczeit funffczehen Wyenner phenning und nicht mer; wir sein auch des obgnanten lehens mit aller seiner czu^egehoru^eng ir rechter gwer und furstand vor alle ansprach, wo^e und fu^er wem, wie offt in des not und durfft geschicht nach dem lands recht ob der Enns; ging in aber an der gwerschaft icht ab mit dem rechten wi^etan schaden si des nemen mit verpotschaff mit nach naysen, wie der gnant wer, den i^er ains oder i^er gwisser scheinpot bei seins selbs trewn gesprechen mag an aid und ungesworn, dem selbigen schaden lob wir in ab cze legen und wider cze chern gancz und gar und schuln sie daz haben cze uns, cze unsern trewn und darczu^e auf aller unser habe, wo wi^er die haben auf wasser oder auf land inner lands oder ausser lands, si^e sei varund oder lickund auf grunden, wie di^e gnant ist, wo in dar auf czaigt wirt der selbigen unser habe mu^egen si^e sich under winden an klag, an furpet und an alle andrew nottaidyngen alz vil und alz offt daz si^e i^er scha^eden und haubtgucz da von bechomen gancz und gar und ist daz unser gutleicher wil und schuln da wider nicht reden noch tu^en weder mit recht noch anrecht geistleich noch wertleich in dhainerlei weiss, haimleich noch offenleich noch ander jemand von unsern wegen an alles geva^er und waz wir da wider rechten, retten oder ta^eten, daz haben sie alleczeit behabt mit dem rechten, und wi^er verlorn. Daz in daz alles sta^et und unczebrochen bleib, daz in dem briff geschriben stet, daru^eber geb wi^er in den offen brieff versigelten mit der erbern Grego^erigen des Rathalmynger die czeit richter cze Starchenberch, und Petern des Pawswecken paider anhangunden insigel, die i^er insigel durch unser fleissigen pet wil an den bri^eff gehangen haben in und irn erben an schaden, dar under wi^er uns verpinden alles daz sta^et cze haben, daz in dem bri^eff geschriben ste^et, wenn wir aigener insigel nicht enhaben. Der briff ist geben nach Christi gepu^erd virczehenhundert jar, dar nach in dem andern jar des nachsten ma^entages vor unser frawn tag cze dinstczeit.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 511-513, Nr. 431