Ich Hainreich der Frasch, der vische^ar tze Trawn, und mein hawsfraw, ich Asmel und ich Ha^ensel, baid des benannten Hainreichs pru^eder und all unser erben verihen und tu^en ku^ent offenleich mit dem brief allen, den er fu^er kumpt, dew in sehent, hornt oder lesent, daz wir mit wolbedachtem mu^et und gu^eten willen tz der tzeit, do wir daz mit recht wol getu^en machten, recht und redleich chaufleich tze chauffen haben geben Ulreichen des Hundleins geswey, und Charen seiner hausfraw und allen irn eriben das Mitterlehen tze ober Wagrain daz drittail, gelegen in Pa^eschinger pharr, daz unser rechtz eribrecht ist von dem erbi^erdigen unserm gena^edigen herre abt Petern und dem gotzhaws ze Chotweig mit all den eren, rechten und nu^etzen, dew dartzu^e geho^ernt, tze haus tze haf, tze haltz, tze veld, tze waid und tze wismad, versu^echt und unversucht umb ain gelt, des wir von in gantz und gar gericht und beczalt sein tzu^e rechten tagen an alle unsern schaden, also haben wir in das vorgenant drittail auf dem Mitterlehen mit aller tzu gehorung in geantwu^ert aus unser nutz und gewer in i^er nu^etz und gewer mit herren hant und aller ste^at und sew du^erch recht daruber bedarften, als wir es selb inne gehabt haben und mugen auch fu^erbaz wol all irn fru^em damit schaffen mit versetzen oder verchauffen, schaffen, machen, geben, wem sew wellent, so in daz aller pest fu^egend ist an irrung und hindernus, uns und aller unser eriben und tu^en uns auch des vobenanten drittails auf dem Miterlehen ga^entzleich, fu^er tzicht, daz wir nymermer dergegen tze sprechen sullen haben noch gewinen noch ander nympt von unsern wegen mit recht noch anrecht in dhainerlay weys an als geve^ar. Wir sullen und wellen auch des vorgenanten chaufs ir recht gewern und fu^erstand sein an all der stat, do in des nat und duerft geschiecht mit dem rechte also chaufes eribrechtz und lanndes ob der Enns recht ist. Gieng in aber an der gewerschaft icht ab, oder das in indert dhain chrieg darinne auf erstunde mit dem rechten, von wem daz we^ar, das sullen wir in als ausrichten an all ir mu^ee und schaden. Ta^eten wir aber des nicht, was sew dann des schaden ne^emen, den sew oder i^err eriben aine ainer gesprechen mochten pey irn trewn unberecht und ungeswarn ir ains warten und trewn darumb slechtleich wol tze glawben, die selben schaden all sulen wir in ab legen, ausrichten und widerchern und sullen sew daz allez haben, dacz uns und unsern trewn und dartzu^e auf aller unser hab, wo wir dew haben, gewinen oder lazzen, iner lanndes oder ausser lanndes auf wazzer oder auf lant, des aller nichtz ausgetzogen, versucht und unversucht. Daz in das alles also ste^at und unverchert beleib, daruber tzu ainem warem und vesten urkund geben wir in den brif besigelten mit des vorgenanten unsers gena^edigen herren abt Petern tze Chotweig anhangunden insigl, daz er tzu beczeugnus durch unser fleissigen pet willen an den brif gehangen hat, im und seinen nachkamen und ir^em gotzhaus an ir^en rechten und vadrung unengolten; dartzu haben wir gepeten den erbe^arn weysen Chunraten den Pulsinger, die tzeit phleger ze Trawn, daz er sein insigl auch tzu betzeugnus an den brif gehangen hat, im und seinen eriben an schaden, under der gegenbu^ertigen insigl wir uns verpinten mit unsern trewn aid weys als daz steat ze haben, daz an dem brif geschriben stet, wann wir selb dhain insigl nicht gehabt haben. Der brif ist geben am samptztag nach sand Grigorigen tag, do man tzalt von Kristi gepu^erd viertzehenhundert jar, und darnach in dem funften jare.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 558f, Nr. 463