Wir Erasm von Gots gnaden abbt ze Lambach und der ganntz convent desselben klosters vergehen offenlich und tun kunt mit dem prieff allen den, so er furpracht und geczaigt wirt, daz fur uns chomen ist Jacob Vorster und seine geswistred, all Michels Stelczer kinder, und habent uns recht und redleich erweiset umb das gut mit aller seiner zugehorung, genant Hufnagleinsod in Welser pharr gelegen, das ez ir rechts vaterleichs erib ist und eribrecht ist von unserm gotshaus. Dasselb benant gut mit aller zugehorung haben wir dem benanten Jacoben und allen seinen geswistreden, Michels Steltzer kinder, und allen iren eriben mit unser hannt und mit gantzer stat ze einem rechten eribrecht verlihen und ingeantwurt in ir aller nutzz und gewer mit allen eren, nutzzen und rechten, so von altar und durich recht darzu gehort ze hause, ze hoff, ze holtz, ze veld, ze wismad, ze waid, versucht und unversucht, wie das genant ist, und so davon bechomen mag, nichts ausgnomen in der beschaiden, das sew uns und unserm gotshaus jarleich alle jar davon raichen und dynen schullen ze unser frawen tag ze der dinst zeit sechtzig newer Wienner phenig und vier huener, an prehentag dreyssig Wienner phenig ze pawstewr und an sant Jorigen tag zehen Wienner phennig ze vogtstewr. Wir offen auch, das sew dhainerlay wanndlung mit dem benanten gut, mit seiner zugehorung nicht sullen haben, weder mit versetzzen, noch mit verchauffen, noch in ander dhainerlay weise an unser hannt und guten willen, und schullen auch alles das davon leiden und dulden gen uns und unserm gotshaus, das ander unsers gotshaus eribler gen uns leident und duldent unvertzigen unsers gotshaus rechten in allen sachen. Und des alles ze urchund geben wir in den prieff, versigelt mit unserm und unsers convents paiden anhangunden insigeln und beschehen ist nach Christi gepurt virtzehen hundert jar darnach in dem syb[endten] jar an eritag vor sant Giligen tag.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 604f, Nr. 495