Ich Hanns der Newsess bekenn fur mich und all main erben offenleich mit disem gewurtigen brief allen den er furkumpt und geczaigt wirt, dy nu lebent oder hernach chunftig werdent, daz ich mit wol bedechten muet und ze der zeit, da ich ezz mit recht wol getun mocht, recht und redleich hab ze chauffen geben dem edlem Fridreichen Friczestorffer, seiner wirtin und ir baider erben ein purkrecht akker, dez da ist suben gwanten ze nagst dem Peter Phenebert im Staynparcz gelegen mit der erbirtigen geistleichen abtte syn hannden icz sannd Pernhart dez egenanten akkers die zeit stifterin und storerin, davon mann ir jarleich dint an sannd Michelstag und nicht mer, wenn zwen phening und den selbigen egenanten akker sol ich egenanter Hanns Newsess schermen dem vorgenanten Fridreichen Friczestorffer nach dem lannds rechten in Ostereich. Wer aber, daz dem vorgenanten Fridreichen Friczestorffer in jars frist icht chrieg oder ansprach daran auf erstund, daz sol ich egenanter Hanns Newsess ausrichten dem vorgenanten Fridreichen dem Friczestorffer und allen sein erben an aller ir mue und ungeverleich. Tet ichs vorgenanter Hanns Newsess aber nicht, so sullen si daz haben, waz si dez schaden namen auf mir obgenanten Hannsen Newsessen und auf allen meinen erben unverschaidenleich und auf allem unserm gut, daz wir haben in dem lannd ze Ostereich inner lannds oder ausser lannds oder wo wir daz haben, ez sein erb oder varund gut. Mit urkund dez briefs besigelten mit meinem obgenanten Hannsen dez Newsessen anhangunden insigel, und dez ist zeug der edel Wenczla von Lewczestorff auch anhangunden insigel, daz er daran gelegt hat durich meiner vleissiger pet willen ze ainer zeugnuss der sach, geben nach Christ purd vierczehenhundert jar und darnach in dem sechzehenten jar an der ayndlefftausent Maydtag.

Source Fulltext: StiAL, Kopialbücher, HS 17, P. Augustin Rabensteiner OSB: Documenta monasterii Lambacensis Bd. II, ab anno 1416-1443, S. 16f, Nr. 615