Wir Herman von Gotes genaden abbt zu Kremsmunster und der convent daselbs bekennen fur uns und unser nachkomen und tun kund mit dem offenn brive, das der edel wolgeboren herre herr Reinprecht von Wallse, zu den zeiten des edeln hochgeboren fursten herczog Albrechts, herczogen ze Osterreich etc., unsers genedigen herren hofmaister und haubtman ob der Ens, von uns gepeten und gewarben hat, das wir im und sein erben die monschaft des hofs, benant Oberklingelprun pei dem Sippach in Kirichperger pfarre gelegen, der von dem Chienast herkomen ist, unsers gotzhaus lehenschaft, geruchten zu aygen, das wir also getan haben. Und haben im und sein erben die lehenschaft des hofs geaignet und gegeben wissenlich in kraft des brifs durich solicher merkchleicher hillf und genaden willen, die der vorgenant herre uns und unserm gotzhaus wissenlich und getrewlich getan hat, und noch hinfur wolgetun schol und mag, also das unser genediger herr von Wallse und sein erben mit dem genanten hof in aygens weys hinfur alln iren frum schaffen mugen als in fuegund ist in der maynung, das wir und all unser nachkomen von der monschaft begen hincz in und den genanten hof chainerlay zuspruch noch vordrung nicht mer haben schuln und welln in chain sachen an geverde. Ze urchund geben wir abbt Herman und der convent ze Kremsmunster den brif fur uns und unser nachkomen versigelten mit unsern baiden angehanngenn insigelln. Geben zu Kremsmunster an sand Thomanstag nach Kristes geburde virczehen hundert jar, darnach im sibenczehenten jare.

Source Fulltext: StiAL, Kopialbücher, HS 17, P. Augustin Rabensteiner OSB: Documenta monasterii Lambacensis Bd. II, ab anno 1416-1443, S. 41f, Nr. 632