Wir Jacob von Gots gnaden abbt ze Lambach und der gantz convent desselben klosters vergehen und tun kund offenleich mit dem brif allen, den er fur kumbt, das wir mit wolbedachtem mut und veraintem rat recht und redleich verkauft haben ze ainem rechten leibgeding unser hub, gelegen in dem Chrotendorff in Offenhawsser pharr mit aller ir zugehorung, und haben die ze kauffen geben Steffan dem Stewber, Annan seiner hawsfrawn, Wernharts Wismair saligen tochter, allain zu ir paider leib ir lebtag und nicht verer, und haben in auch die benanten hub verlihen und eingeantwrt in ir nutz und gewer mit allen den ern und nutzen, die von allter dar zu gehorent und davon bekomen mugen, nichts ausgenomen in der beschaiden, das sew ir lebtag uns und unserm gotzh[a]ws jarleich davon diennen und raichen sullen z[e] unser frawntag ze der dinstzeit sechs metzen waitz, zwen metzen gersten, funftzehen metzen habern und sechs huber, an sand Michelstag zwaintzig phenig ze weinfur, an sand Andrestag sechtzig phening fur ain swein, an dem prehentag sechtzig phening ze pawstewr, an sand Jorgen tag zwaintzig phening ze vogtstewr, an sand Kilians tag zwen chas fur zwen pheng, fur werichhart acht Wienner pheng und ain vaschang hun und nicht mer. Wir sein auch der hub mit aller ir zugehorung und leibgedings darauff zu ir paider leiben ir lebtag und nicht verer recht gewern und furstandt, wo in des mit recht, not und durft geschicht, alls leibgedings und des lanndes recht ist ob der Enns. Wir melden auch, wann die benanten zwen leib Steffan und Anna mit dem tod abgent, da Got lang ver sey, so ist dew benant hub mit ir zugehorung in aller der masz, als wir sey dann vinden und begriffen wirdet, unserm gotzhaws gantzleich herwider ledig und frey als vor an aller ir erben und frewnt irung und hindernus ungeverleich. Das in die red stat und unverchert ir paider lebtag beleib, daruber geben wir in den brif, versigelt mit unser und unsers convents paider anhangunden insigeln, der geben ist nach Christi geburd viertzehen hundert jar, darnach in dem zwaintzigisten jar an sand Bartelmes tag des heilligen zwelifpoten.

Source Fulltext: StiAL, Kopialbücher, HS 17, P. Augustin Rabensteiner OSB: Documenta monasterii Lambacensis Bd. II, ab anno 1416-1443, S. 103f, Nr. 665