Wir Jacob von Gots gnaden abbt ze Lambach bekennen mit dem offen brif, das fur uns komen ist Yban Chramer, burger ze Wels, und hat wolbedachtleich verkauft sein ^haus, gelegen in unserm purkchfrid ze Lambach zwischen des Pawswekchen und Ulleins des Smids hawsern, das er auch kaufleich in sein gewalt bracht hat von Ulreichen dem Chramer, burger ze Gmunden, und Margreten seiner hawsfrawn, des wir mit urchund erweiset sein, die er von unserm goczhaws darumb gehabt hat, und hat das ze kauffen geben Hannsen dem Poserl, Annan seiner hawsfrawn und allen seinen erben umb ain gelt, des er gantz betzalt ist. Allso haben wir dem benanten Hannsen dem Poserl, Annan seiner hawsfrawn und allen sein erben das egenant haws und hofmarich verlihen ze rechtem purkchrecht mit allen den ern und nutzen, die von allter darzu gehorent, nichts ausgenomen in der beschaiden, das man uns und unserm gotzhaws jarleich davon diennen und raichen sol an suntag nach dem prehentag viertzehen Wienner phennig. Es ist auch der benant Yban und sein erben des kauffs recht gewern und furstandt fur ansprach als offt in des mit recht, not und durft geschicht, allso kauffs und purkchrechts recht ist in dem lanndt ob der Enns. Wir offen, sew sullen dhain wanndlung damit haben in dhainerlay weis an unser hanndt und guten willen unvertzigen unsers purkchrechts rechten in allen sachen. Des ze urchund geben wir in den brief, versigelt mit unserm anhangunden insigel, geben nach Christi geburd viertzehen hundert jar, darnach in dem ains und zwaintzigisten jar an sand Jacobs tag.

Source Fulltext: StiAL, Kopialbücher, HS 17, P. Augustin Rabensteiner OSB: Documenta monasterii Lambacensis Bd. II, ab anno 1416-1443, S. 120f, Nr. 681