Wir Hanns von Gotes genaden abt ze Lambach bekennen mit den offenn brief allen den er furbracht wirt, das fur uns komen sind Haintzel von Gyllring, sein hawsfraw Anna und habent wolbedechtleich mit aller irer erben willen und rat nachsten frewnt zu der zeit, do sy ez wol tan mochten, mit unser handt recht und redleich verkauft das Vetelgut mit seiner zugehorung ze nider Teyssing gelegen in Rewtthaymer pharr und erbrecht ist von uns und unserm gotshauss und der benanten frawen Anne rechtz erb gewesen und auch ir benanter man kaufleich in sein gewalt bracht hat, als wir dez wol erweiset sein worden, und habent ze rechtem kauff das verkauft Chunraten von nyder Teysing, Elspeten seiner hausfrawen und allen irn baider erben umb ein gelt, dez sy gentzleich von in gewert und betzalt sein an scheden. Also haben wir dem benanten Chunraten, Elspeten seiner hausfrawen und iren baider erben das benant Vetelgut mit seiner zugehorung ze rechtem kauf verliehen und eingeanttwurt mit allen den eren, rechten und nutzen, so von alter und durch recht darzu gehort und davon bekomen mugen ze hoff, ze hauss, ze holtz, ze veld, ze wismad, ze waid, versucht und unversucht, nichtz ausgenomen angever in der beschaiden, das man uns und unserm gotzhaus jerleich und all jar davon raichen und dienen scholl einen gueten Wiener pfenning und ain huene zu unser frawn tag ze der dienst zeit. Es sind auch der benant Haintzel, sein hausfraw Anna und all ir erben dez obenanten Chunraten, seiner hausfrawen und ir baider erben n dez kaufs auf dem vorbenanten gut und seiner zugehorung recht gewern und furstandt an aller stat, wie oft in dez mit recht, not und durft geschiecht, als solhes kaufs und dez landtz ob der Enns recht ist. Wir offen, das sy dhainerlay handlung noch wandlung nicht haben sullen mit dem benanten gut und seiner zugehorung weder mit versetzen, verkauffen noch in ander dhainerlay weiss an unser handt und guetleichen willen und sullen auch davon alles daz leiden und dulden, das ander unsers gotzhaus eribler gen uns leident und duldent unvertzigen unsers gotzhauss rechten in allen sachen. Dez ze urkund geben wir den brief versiglten mit unserm anhangunden insigel, der geben ist nach Christi gepurd viertzehenhundert jar, darnach in dem funfundtzwayntzigsten jar an aller man vaschang tag.

Source Fulltext: StiAL, Kopialbücher, HS 17, P. Augustin Rabensteiner OSB: Documenta monasterii Lambacensis Bd. II, ab anno 1416-1443, S. 173-175, Nr. 724