Wir Thaman von Gotes genaden abbt ze Lambach bechennen mit dem brief, das fur uns komen sind Wolfgang von Dorff, Susanna, Stephan von Prukkk seligen hawsfraw, und Kuenrad, Hainreichs von Weyding seling sun, anstat sein und seiner geswisstred, und habent miteinander veraintleichen und mit guetem willen aller irer eriben und miteriben rechtt und rechtleichen verchawfft drew viertail an dem guet ze Gewdnperg, ist genant das Kapperguet mit seiner zuegehorung, gelegen in Regawer pharr, Jacoben von Wankchaim, seiner hawsfrawn Margrethen und all seinn eriben, und das vierd viertail, das ist sein rechts erib von uns und unserm gotzhaus. Also haben wir das gemelt guet mit aller seiner zuegehorung, darinn nichts ausgenammen angever, verlihen und bestett zu rechttem eribrecht dem gemelten Jacoben, seiner hausfrawn Margreten und allen sein eriben in der beschaiden, das man uns und unserm gotzhaus alle jar davon dienn und raichen sol zu unser lieben frawn tag zu der dienstzeit dreyssigk new Wienner phening, zu dem brehentag zwainczigk Wienner ze pawstewr, zw sand Jorgen tag zehen Wienner phennig ze vogtsteur und drew huenr. Es sind auch dy gemelten Wolfgang, Susanna, Kuenrad, Weydinger an stat sein und seiner geswisstred und ir aller eriben und miteriben des egemelten Jacoben seiner hawsfrawn und seiner eriben der gemelten dreyer viertail und alles zuegehorung ir recht gewern und furstand fur all rechtleiche ansprach, als offt in des mit recht, not und durft geschiecht, als dan chawffs, eribrechts und lants ob der Ens recht ist. Wir melden auch, das sy chainerlay wandlung damit nicht haben schuellen in chainer weis an unser handt und schuellen auch alles das davon leyden und dulden, das ander unsers gotshaus eribler gein uns leydent und duldent unverczigen unnsers gotshauss rechten in allen sachen. Des ze urkund geben wir in den brief, besigelten mit unserm anhangunden insigel, der gegeben ist nach Christt gebuerde vierczehenhundert jar und dar nach in dem sechsunddreyssigisten jare an sand Mertheins tag des heiligen.