Alexander miseracione divina titulo sancti Laurencii in Damaso sancte Romane ecclesie presbyter cardinalis, patriarcha Aquilegiensis, administrator ecclesie Tridentine per sacrosanctam generalem synodum Basiliensem universalem ecclesiam representantem, per Germanie partes legatus de latere specialiter deputatus duxque Mazovie etc. religioso viro n. abbati monasterii Lambacensis, ordinis sancti Benedicti, Pataviensis diocesis, salutem in Domino sempiternam. Commissum nobis legacionis officium digne peragere sathagentes promptum et benivolum libenter illis favorem impendimus, in quorum habetur desideriis, ut sub vita regulari in puritate consciencie Domino famulantes mereantur gloriam perpetue claritatis, hinc est, quod nos devotis tuis supplicacionibus inclinati auctoritate legacionis, qua fungimur in hac parte presencium tenore indulgemus, ut aliquem ydoneum et discretum presbyterum religiosum aut secularem curatum aut non curatum in tuum possis eligere in confessorem, qui confessione tua diligenter audita pro commissis peccatis et delictis, eciam si ex labe symonie aut alias talia sint, propter que merito sedes apostolica foret consulenda et a quibuscunque excommunicacionis, suspensionis et interdicti sentenciis per constituciones synodales et provinciales diffiniciones et statuta monasterii et ordinis predictorum seu alias a iure vel ab homine generaliter promulgatis penis et censuris aliis quibus ligatum te forsan credis, tibi debitam absolucionem impendat et penitenciam iniungat salutarem. Insuper prefato confessori tuo, quem duxeris eligendum auctoritate predicta committimus, ut si quam irregularitatis maculam premissis sentenciis vel penis seu aliqua premissarum sic ligatus aut alias coram excommunicatis, suspensis ac locis interdictis scienter vel ignoranter, non tamen in contemptum clavium, divinis te immiscendo officiis contraxisti vel incurristi te prius ad tempus, de quo ipsi confessori videbitur, a tuorum ordinum execucione, suspenso suffragantibus tibi meritis alioque canonico non obstante, super irregularitate premissorum occasione contracta, idem confessor auctoritate predicta misericorditer dispenset, rehabilitet ac in pristinum satum, in quo ante peccate, ut premittitur, forte commissa eras, reponat et restituat. Ceterum discrecioni tue presencium tenore committimus, quatenus auditis per te vel alium presbyterum ydoneum, quem ad hoc deputaveris, singulorum dicti monasterii monachorum, noviciorum ac conversorum actu professorum et hinc ad sex annos profitendorum confessionibus ipsos a sentenciis, penis et censuris predictis, si quas incurrerint, tu vel idem confessor sic deputandus absolvas, vel absolvat, et super irregularitate et inhabilitate si quas ipsi monachi aliqua dictarum sentenciarum ligati contraxerint, in omnibus et per omnia iuxta modum et formam prescriptos dispenses seu dispenset misericorditer cum eisdem, ita tamen, quod tu vel alius prefatorum dicti monasterii monachorum, noviciorum, conversorum, si quibus ob premissa ad satisfaccionem aliquam teneamini, satisfacias vel satisfaciant competenter, alioquin presens nostra concessio ad premissa vobis nullatenus suffragetur presentibus ad sex annos in suo robore duraturis. Datum Wienne vicesimasexta die mensis may anno a nativitate Domini millesimoquadringentesimo quadragesimotercio predicta sacrosancta synodo durante.