Albrecht von Gotes gnaden||
erczherczog ze Osterreich etc.

Ersamen, geistlichen, andechtigen, lieben und getrewn. Als wir ew nachst geschriben haben anvercziehen herab zu unns ze komen, wann wir ewr des tags halben, so durch gemaine lanndtschafft zu Wienn gehalten sol werden, notturfftig sein, damit lanndt und leut in frid und gemach geseczt und solh merklich schad und verderben vermiten und abgetan werd, also begern wir noch an ew mit sunnderm ernst und fleiss, ir wellet ew furderlich von stund nach angesicht des briefs her zu uns fugen, damit solher gemain nucz furgang habe und durch ew nit verhindert werde, und tut darin kain anders als wir uns des unzweifnlich zu ew versehen. Wir schreiben auch hiemit unnserm mautter zu Lynncz, das er ew mit scheffen, zullen und anderer notturft auf das wasser fursehe. Datum zu Tullen an freytag vor sant Jacobs tag apostoli anno domini etc. lxii^o.