Wir Thoman von Gottes genaden abbt ze Lambach bekennen mit dem brief, das fur uns komen ist Margreth dy Poschleinspergerin und hat mit wolbedachtem mut und gutem willen recht und redleichen verkaufft das Nidergut ze Poschleinsperg gelegen in Gunskircher pharr irm lieben aidem und enekchleinn Thomann, seiner hausfrawn Margrethen und iren baiden erben umb ain sum gelcz, der sy gantz und gar ausgerichtt und beczalt worden ist zu rechtten tagen an allen schaden. Also haben wir in den yetz benanten Thomann, Margrethen und iren baiden erben das obgenant gut bestett und verlichen, was wir in rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon raichen und dienn sol zu unnser lieben frawntag der dienstzeit funnff Wienner phenning. Es ist auch die obgemeltt Margreth Poschleinspergerinn und all ir erben des obenanten guts mit aller seiner zugehorung des vorberurten Thomann, seiner hausfrawn und irr baider eriben rechtt gwern und furstandt fur all rechtleichew ansprach, wo und wann in des not und durft beschiecht mit dem rechten, als dann solhs kauffs und lanndes ob der Enns recht ist. Wir offen auch, das sy kainerlay wandlung damit nicht haben sullen in kainerlay weis an unnser handt und gutem willen, und sullen uns auch alles das davon leyden und dulden, das annder unnsers gotshauss erbler gein uns leydent und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngunndem insigel. Geben als man zalt nach Kristi geburd in dem vierczechenhunndertunddreynundsechczigisten jaren an eritag vor sannd Greiorigentag des heiligen babst und lerer nach Reminiscere in der vasten.