In nomine Domini amen. Omnes enim unum corpus secundum apostolum sumus in Christo, debemus ergo karitatis operibus que sola sunt profutura frequenter intendere, ne scindamur ab huius corporis unitate que magis pro illis sunt necessario, qui iam extra statum merendi positi penarum transeuncium subduntur rigori, proinde nos frater Thomas abbas, Leonhardus prior totusque conventus monasterii sancte Marie virginis in Altovado, ordinis Cisterciensis dyocesis Pragensis, reverendo in Christo patri ac domino domino Thome venerabili abbati presenti et successoribus suis et suo devotissimo conventui monasterii Lambacensis ordinis sancti Benedicti Pathaviensis dyocesis, universis ac singulis tam presentibus quam futuris concorditer de capituli nostri consensu damus et concedimus in vita et in morte nostrorum ac vestrorum successorum per tempora perpetua duraturam plenam ac perfectam devotamque in Deo et inconwulsam confraternitatem et participacionem cunctorum spiritualium bonorum ut missarum, oracionum, abstinenciarum, vigiliarum, elemosinarum omniumque virtutum salutarium, que in domo nostra per presentes atque futuros divina dignabitur clemencia operari adicientes atque nichilominus nos obligantes ob eiusdem caritatis vicissitudinem, ut cum unius vel plurium domus vestre dies obitus, quem dominus felicem faciat nostro monasterio fuerit intimatus tum sollempni observancia ordinis nostri omnia et singula humiliter vigilias et missam defunctorum iuxta consuetudinem nostri monasterii persolvemus, sed et singuli sacerdotes missas legentes singulas missas, clerici vero missas non legentes officium defunctorum totum vesperas scilicet vigilias novem leccionum cum laudibus, conversi quoque centum pater noster cum totidem ave Maria in remedium animarum eorundem dicent. In premissorum omnium testimonium nostrum et conventus nostri sigilla presentibus sunt appensa. Datum anno Domini millesimo quadringentesimo sexagesimo sexto sabbato in vigilia penthecostes.