Wir Thoman von Gots gnaden abbt ze Lambach bekennen mit dem brief, das uns an ainem besigeltem aufgabbrief aufgesanndt haben Jacob Kramer, burger ze Wels, und Anna sein hausfraw, und habent mit wolbedachtem mut und gutem willen recht und redleichen verkaufft den hof genant Schaitelperg, gelegen in Talhaimer pharr, der erbrecht ist von uns und unnserm gotshaus und hat den ze kauffen geben Jorigen dem Topler im Podelspach, Thomann des Topler daselbst weilandt gesessen seligen sun, seiner hausfrawn Kunigunden, Gabrieln zum Stainhaus des Grueber tochtter und irn baiden erbn umb ain sum gelts, der sew gantz und gar ausgerichtt und beczalt worden sind zu rechtten tagen an allen schaden. Also haben wir im dem bemelten Jorigen Topler, seiner hausfrawn Kunigunden und irn baiden erbn den gemeltten hof mit aller zugehorung bestett und verlichen, was wir in rechtleichen daran bestetten und verleichen sulln oder mugen, doch das man uns und unnserm gotshaus all jar jarleichen davon raichen und dienn sol zu unnser lieben frawntag der dienstzeit sechczig Wiennes pfenning, zu sannd Jorigentag zechen Wienner pfenning zu vogtstewr. Es sind auch die obgenanten Jacob Kramer, sein hausfraw Anna und irer baider erbn des obenanten hoffs mit aller zugehoerung des bemeltten Jorigen Topler, seiner hausfrawn Kunigunden und irer baider erben recht gwern und furstandt fur all rechtleiche ansprach, wo und wann in des not und durft beschiecht mit dem rechten als dann solhs kauffs und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weis an unnser handt und gutem willen, und sulln uns auch alles das davon leyden und dulden, das annder unnsers gotshauss erbler gein uns leydent und duldent unverczigen unnsers gotshauss rechten in allen sachen. Mit urkund des briefs, den wir in also darumben geben, besigelt mit unnserm anhanngundem insigl. Geben als man zalt nach Kristi geburde in dem vierczechenhunndertundsechsundsechczigistem jare an mantag nach sannd Luceintag.