Wir Fridreich, von Gots gnaden romischer kaiser, zu allen tzeiten merer des reichs, zu Hungern, Dalmacien etc. kunig, hertzog zu Osterreich, zu Steir etc. embieten dem ersamen geistlichen unserm lieben andechtigen n. dem abbt zu Lambach unser gnad und alles gut. Uns hat die erber Kathrey Holtzpergerin zu Abstorff anbringen lassen, wie unser getrewr Niclas Mosl und Margreth sein hawsfraw ir swester ettlich guter, dartzu sy erblich gerechtigkait hab, an iren willen und uber ir widerruffen unserm getrewn Hainreichen Freyseysen zu sannd Jorgen im Attergew verkaufft und das ze tun nicht macht gehabt haben, des sy sich beswert bedunket. Emphelhen wir dir ernstlich und wellen, daz du die benanten Mosl, Kathrein und Margreth auf ain benanten tag furderlich fur dich ervordrest, sy brief, kundschafft und was yeder derselben tail da furbringen wirdet und zu geniessen mainet horest und versuhest gutlich zu verainen. Mocht des aber nicht gesein, als dann ettlich, so dich dartzu gut bedunkhen und du ungeverlich dabey gehaben magst, zu dir nemest und sy mit recht darumb entschaidest, daran tust du unser ernstliche maynung. Geben zu Gretz am sambstag vor dem suntag letare zu mittvassten anno domini etc. lxviii^o unsers kaisertumbs im sibentzehenndten jare.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. V, ab anno 1461-1482, S. 269f, Nr. 2612