Fridreich von Gots gnaden||
romischer kaiser etc.

Ersamer geistlicher lieber andechtiger. Als wir am nagsten ain anslag ains anlehens zu beczallung der sum gelts, so wir unserm lieben getrewn Reinprechten von Walsse unserm haubtman ob der Enns schuldig beleiben, auf dich tan und dir geschriben und bevolhen haben, dieselb sum gelts demselben von Walsse auszerichten, hat uns derselb von Walsse anpringen lassen, wie du in derselben summ gelts bisher nicht entricht hasst und im die noch unbezallt ausstee, das uns frembt nymbt und nicht gevellt, emphelhen wir dir ernstlich und wellen, daz du die bemelt summ gelts dem obbemelten von Walsse oder seinem anwald, dem er das bevilht, noch an lennger vertziehen und aufschub ausrichtest, gebest und im damit nicht weiter vertziehest noch annders tust, wurdest du im aber damit vertziehen und uns daraus schad auferstund, desselben schadens wellen wir uns zu dir halten und von dir und deinem gotshaws bekomen, auch schaffen dein und desselben deins gotshaws leutt darumb aufzuhalten, daran tust du gennczlich unser ernstliche maynung. Geben zu Villach am sambstag vor sannd Marienmagdalenen tag anno domini etc. lxx unsers kaisertumbs im newnczehenten jare.