Wir Fridreich, von Gots gnaden romischer kaiser, zu allenn tzeitn merer des reichs, zu Hungern, Dalmacien, Croacien etc. kunig, hertzog zu Osterreich, zu Steir, zu Kernnden und zu Krain etc. bekennen, daz uns unser getrewr Anndre Ledrer, unser burger zu Welss und die erber Kathrey, sein hausfraw, an irm offenn besigelten brief den zehent auf der obern hueb und auf der nydern hueb zu Weispach klainen und grossen in Penibannger pharr gelegen unserr lehenschafft unser furstentumbs Osterreich der herschaft Steir aufgesanndt und diemuticlich gebeten haben, den unserm getrewn Conradten Zehenntner und der erbern Margreten seiner hausfrawn zu verleihen, wann sy in den verkauft hieten, das haben wir getan und haben denselben Zehenntner und seiner hausfrawn den berurten zehent auf den obgemelten huben mit seiner zugehorung verlihen und leihen auch wissenntlich mit dem brief, was wir in zu recht daran verleihen sullen oder mugen, also daz sy und ir erben den nuhinfur von uns und unsern erben in lehensweis innhaben, nutzen und niessen sullen und mugen als lehens und lannds recht ist ungeverlich. Mit urkund des briefs geben zu der Newnstat an freitag nach gotsleichnams tag nach Cristi geburde im viertzehenhundert und zwayundsybentzigisten, unsers kaisertumbs im ainsundtzwaintzigisten, unserr reich des romischen im drayunddreissigisten und des hungrischen im viertzehenten jaren.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. V, ab anno 1461-1482, S. 423f, Nr. 2731