Fridreich von Gots gnaden romischer kayser||
zu allenn zeiten merer des reichs etc.

Ersamer geistlicher lieber andechtiger, uns haben unser getrewn n. unser fertitiger zu Gmunden anbringen lassen, wie du von dem saltz, so auf dem wasser herab am Stadl furgefurt und daselbs nicht abgelegt wirdet, von ainem phunt kuffl vier kuffl saltz als von dem saltz, so daselbs abgelegt wirdet ze nemen und ze haben mainest, das sy sich beswert bedunkhen, nachdem von allterher allain von dem saltz, so dasselbs am Stadl nidergelegt albeg von ainem phunt kuffl vier kuffl geben worden sein, emphelhen wir dir ernstlich, daz du von demselben saltz, so daselbs am Stadl furgefurt und da nicht abgelegt wirdet khain saltz nemest, dieselben ferttiger darumb unangelanngt und unbekumert lassest und es damt haltest als von alter ist herkomen, daran tust du unser ernstliche maynung. Geben zu Gretz an mittichen nach allerheiligen tag anno domini etc. lxxii unsers kaysertumbs im ainsundzwainzigisten jare.