Reverendissime in Christo pater et domine domne ac preceptor colendissime, sacre apostolice sedis legate a latere dignissime, supplicat vestre reverendissime paternitati humilis et devotus capellanus frater Johannes abbas monasterii Lambacensis, quantus propter relevacionem scrupulorum conscienciarum, qui plerumque eciam devotos ac deo servire cupientes occupant atque gravant, dignetur et misericorditer impertiri auctoritatem eligendi sibi confessorem curatum vel non curatum, religiosum vel secularem, qui eum absolvere possit ab omnibus casibus et censuris excommunicacionis, suspensionis et interdicti atque peccatis, qui vel que de iure vel consuetudine seu speciali reservacione ad auctoritatem dyocesani episcopi sui spectant et pertinent et cum eodem super irregularitate vel irregularitatibus prefatis, ut prefertur, ex censuris contractis, dispensare tociens quociens oportunum fuerit ad dies vite sue sine revocacione. Et quod predictos abbas vel cui commiserit eandem auctoritatem per omnia et in omnibus habeat super omnes fratres sui monasterii professos, novicios et hospites ibidem commorantes ad idem tempus misericorditer et pure propter deum concedere dignetur. Et quod sola signatura ad concessionem huiusmodi indulti sufficiat. Attenta devotione supplicantis quam gerit in sanctam apostolicam sedem placet in omnibus ut petitur. Alexander episcopus Forliniensis