Alexander Dei et apostolice sedis gratia episcopus Forliniensis, sanctissimi domini nostri pape referendarius et in Germania cum potestate legati de latere orator etc. Reverendo in Christo patri domino abbati monasterii Lambacensis ordinis sancti Benedicti Pataviensis diocesis salutem in Domino sempiternam. Ex parte dilecti nobis in Christo Mathie Hofmaister ex Viechtag scolaris Ratisponensis diocesis nobis fuit humiliter supplicatum, quatenus non obstante defectu natalium quem patitur de soluto et soluta genitus ad omnes sacros ordines eciam presbiteratus promoveri et beneficium ecclesiasticum eciam si curam habeat animarum obtinere possit et valeat secum misericorditer dispensari dignaremur. Nos igitur auctoritate apostolica nobis specialiter concessa, discretioni tue committimus et mandamus, quatenus consideratis diligenter circumstanciis universis, que circa ydoneitatem persone precipue sunt attendende, si paterne incontinentie non est ymitator, sed bone conversationis et vite sufficientisque litterature, super quo tuam conscientiam oneramus, cum ipso ut defectu huiusmodi non obstantibus ad dictos ordines possit promoveri et in eis postquam promotus fuerit libere et licite ministrare necnon unum beneficium ecclesiasticum eciam si curam habeat animarum obtinere auctoritate predicta dispenses, ita tamen quod dictus Mathias prout requirunt onera benficii, quod eundem post dispensationem huiusmodi obtinere contigerit se faciat a iure statutis temporibus ad ordines huiusmodi promoveri. In quorum omnium et singulorum fidem et testimonium premissorum has presentes literas exinde fieri fecimus et sigilli nostri consueti iussimus appressione comuniri. Datum Wienne anno Domini millesimo quadringentesimo octuagesimo, indictione terciodecima, die vero tercia mensis novembris pontificatus sanctissimi in Christo patris et domini Sixti divina providentia pape quarti anno eiusdem decimo.