Wir Johanns von Gots gnaden abbt zw Lambach bekennen mit dem prieff, das fur unnsern anwallt und verbeser prueder Panngratzen unnsern keldner in unnserm abwesen komen ist Hanns Pranndtl von obern Heyschpp und Anna sein hawsfraw und haben mit wolbedachtem muet und guetem willen recht und redlichen verkawfft und zw kauffen geben all ir eribschafft und gerechttigkayt, so sew gehabt haben an der halbm huebm zu Gasstaig geleich halber, das in oder aws gantzer huebm ain viertayll, das sew dann kewflichen in ir gwalltsam pracht haben von Ulreichen Rinderor zw Dikchach und Marigrethn seiner hawsfrawn, die das auch kewflichen in ir gwalltsam pracht haben von Liennhartn Lenngenlocher, des sew unns erweyst haben mit prieflicher urkund vormalln auch von unns awsganngen, die gelegen ist in Stainnakiricher pfarr, und haben das zw kawffen geben Wolfganngen Hayder, seiner hawsfrawn Elspettn und iren payden eribm umb ain sum gellts, der sew von in ganntz und garr awsgerichtt und betzallt wonden sein zw rechtn tagen an allen abganng und schadn. Also haben wir in dem yetzgemelltn Wolfganng, seiner hawsfrawn Elspettn und iren paiden eribm die vorbenant eribschafft und gerechtigkayt an der egenantn halbm huebm geleich halber, das ist ain viertaill aws ganntzer hueben bestatt und verlichen, was wir in rechtlichen daran bestatten und verleichen sullen oder mugen, doch das man unns und unnserm gotshaws allew jar jarlichen davon raichen und dyen soll nach innhalt, lawtt und sag unnsers gotshawss urbarpuch. Es ist auch vorgenannt Hanns und Anna sein hawsfraw fur sich und all ir payder eribm der vorbenanttn eribschafft und gerechttigkaytt an der vorbenantn halbem huebm geleich halber mit irer rechtlichen zuegehorung des obbenantn Wolfganng, seiner hawsfrawn Elspettn und irer paider eribm recht gewern und furstanndt fur allem rechtlichew ansprach, wo und wann in des nott und durfft beschiechtt mit dem rechtn, alls dann solhs kawffs und lanndes ob der Enns recht ist. Wir offen auch, das sew kainerlay wanndlung damit nicht haben sullen in kainerlay weys an unnser hanndt und gueten willen, und sullen unns auch alles das davon leyden und dulden, das ander unnsers gotshawss eribler und hindersassen gein unns leydennt und duldent unvertzigen unnsers gotshawss rechtn in allen sachen. Zw urkund geben wir in des allso den offen prieff, besigllt mit unnserm anhanngundn insigl. Der prieff ist geben nach Krisstii gepurde viertzehenhundert und im achtzigkissten jare am mantag vor sand Symon und Judastag der heyligen zwelyfpoten.