Prosper de Cafarellis de Roma Dei et apostolice sedis gratia episcopus et princeps Asculanus, legatus, nunctius et orator apostolicus etc. universis et singulis presentes nostras literas visuris, lecturis pariter et audituris salutem in Domino sempiternam. Virgo venustissima et omnium virtutum floribus et aromatibus insignita, virgo Dei genitrix gloriosa, de cuius pulchritudine sol et luna mirantur eiusque precibus iuvatur populus christianus florem preciosum in inarcessibilem et eternum dominum nostrum Jesum Christum humani generis redemptorem ineffabili spiritus sancti cooperante gratia produxit, pro cuius reverentia virginis loca sub ipsius vocabulo insignita sunt a Christi fidelibus merito veneranda, ut etiam ipsi exercentes opera pietatis eius piis adducti suffragiis eterne retributionis premia consequi mereantur. Cupientes igitur, ut monasterium Lambacense ordinis sancti Benedicti Pataviensis diocesis, quod in honorem beatissime et intemerate virginis Marie et beati Kiliani episcopi et martiris fundatum extitit in suis structuris et edificiis debite reparetur, conservetur et manuteneatur ac libris, calicibus, luminaribus et aliis ornamentis ecclesiasticis pro divino cultu magis decenter muniatur et a Christi fidelibus iugiter veneretur congruis quoque frequentetur honoribus et ut Christi fideles eo libentius causa devotionis cunfluant ad eundem et ad reparationem, conservationem, manutentionem et munitionem huiusmodi promptius manus porrigant adiutrices, quo ex hoc dono celestis gratie uberius conspexerint se refectos pro parte venerabilis dilecti nobis in Christo Johannis abbatis Lambacensis dicte diocesis porrectis nobis humilibus supplicationibus inclinati omnibus et singulis Christi fidelibus prefatis vere penitentibus et confessis utriusque sexus, qui monasterium prefatum in nativitatis Domini nostri Jesu Christi, purificationis sancte Marie virginis, assumptionis eiusdem, sancti Kyliani et sociorum eius et in dominico quo canitur in ecclesia Dei Letare Ierusalem et ipsius dedicationis festivitatibus annuatim visitaverint a primis vesperis usque ad secundas vesperas inclusive et ad premissa manus porrexerint adiutrices pro singulis diebus festivitatum earundem, quibus id fecerint, de omnipotentis Dei misericordia et beatorum Petri et Pauli apostolorum eius auctoritate confisi quadraginta dies indulgentie de iniunctis eis penitentiis de uberioris dono gratie misericorditer in Domino relaxamus. Et ut dictum monasterium uberiori gratia decoremus omnibus et singulis Christi fidelibus prefatis qui singulis diebus visitant ecclesiam sancti Johannis Baptiste annexam et capellam beate Marie Magdalene pro singulo die quadraginta dies indulgentiarum more solito indulgemus presentibus perpetuis futuris temporibus duraturis. Datum in monasterio Lambacensi sub anno a nativitate Domini millesimoquadringentesimooctuagesimoprimo die decimaseptima mensis augusti pontificatus sanctissimi in Christo patris et domini domini Sixti divina providentia pape quarti anno undecimo.