Venerabilibus ac religiosis in Christo patribus et fratribus domino Johanni abbati totique conventui monasterii Lambacensis ordinis sancti Benedicti Pataviensis dyocesis. Nos Kylianus, Dei gracia abbas, n. prior totusque conventus monasterii sancte Marie in Seytensteten ordinis et dyocesis eorundem cum sincere caritatis affectu salutem in Domino perenniter adipisci. Quia mediante caritate que vinculum perfeccionis ab apostolo predicatur membra singula in corpore sancte ecclesie sibi in vicem coniunguntur et Christo suo capiti ad percipiendam per ipsum et in ipso graciarum spiritualium influenciam uniuntur, tanto liberius sinum caritatis in ampliande confraternitatis consorcium dilatamus, quanto ad participacionem fructus huiusmodi fervencius anhelamus. Unde vestrarum caritatum religiositate qua specialiter fulgetis attracti matura deliberacione prehabita plene confraternitatis scilicet omnium bonorum consorcium et communionem in missis, oracionibus, elemosinis, abstinenciis et vigiliis aliisque virtutum exerciciis, que divina clemencia per presentes nos et successores nostros in dicto nostro monasterio misericorditer dignabitur operari vobis ac successoribus vestris vigore et tenore presencium libere concedimus, adiicientes eciam quod cum obitus unius fratris aut plurium vestri monasterii professi aut professorum nobis intimatus fuerit vigilias et missam defunctorum iuxta consuetudinem nostri monasterii persolvemus sed et singuli sacerdotes missas legentes singulas missas clerici vero missas non legentes officium defunctorum totum vesperas scilicet et vigilias novem leccionum cum laudibus, conversi vero quinquaginta Pater noster cum totidem Ave Maria in remedium animarum eorundem dicent. In quorum omnium evidens testimonium et robur has patentes literas sigillis nostris munitas vobis prefatis patribus et fratribus nostris tradere decrevimus. Datum in monasterio nostro prefato die sancte Johannis ante portam latinam anno Domini millesimo quadringentesimooctogesimoprimo.