Wir Johanns von Gots genaden abbt zw Lambach bekennen mit dem prief, das fur unns komen ist Magdalena, Wolfgang Guldan eelichew hawsfraw, und hat mit wolbedachtem muet und guetem willen recht und redlichen verkawfft und zw kawffen geben all ir eribschaft und gerechttigkaytt, so sy gehabt hat an der seldn am Nydernstadl in Widmspekcher pfarr gelegen und verkawfft in ainem funfftaill in der egenanten seldn ainen viertaill, der ir dann eriblich zuegefallen ist von Steffann irem lieben pruedern saling und hat das zw kawffen geben Steffan, der getz hewslich darawff sytzt, seiner hawsfrawn Marigrethn und iren paidn eribm umb ain sum gellts, der sy von in ganntz und gar awsgericht und betzallt wordn ist zw rechtn tagen an allen abganng und schadn. Allso haben wir in dem yetz genanten Steffann, seiner hawsfrawn Marigrethn und iren paidn eribm die vorgenant eribschafft und gerechttigkaytt an der obbenanten seldn das viertaill aws dem funfftaill vorbestymbt bestat und verlichen, was wir in rechtlichen daran bestatten und verleichen sullen oder mugen, doch das man unns und unnserm gotshaws allew jar jarlichen davon raichen und dienn soll nach innhaltt, lawt und sag unnsers gotshawss urbarpuech. Es ist auch die vorbenant Magdalena fur sich und all ir eribm des obbenantn viertaill in dem funffttaill aws der vorgemelltn seldn des offt bemelltn Steffann, seiner hawsfrawn Marigrethn und irer paider eribm recht gewern und furstandt fur allew rechtlichew ansprach, wo und wann in des not und durfft beschiecht mit dem rechten, alls dann solhs kawffs und lanndes ob der Enns recht ist. Wir offen auch, das sew kainerlay wanndlung damit nicht haben sullen in kainerlay weys an unnser hanndt und gueten willen, und sullen unns auch alles das davon leydn und dulden, das ander unnsers gotshawss eribler und hindersassen gein unns leydent und duldent unvertzigen unnsers gotshawss rechtn in allen sachen. Zw urkund geben wir in des also den offen prieff, besigelt mit unnserm anhanngundn insigl. Der prief ist geben nach Krissty gepurde viertzehenhundert und im ainsundachtzigkissten jare am mantag nach sand Mertntag des heyligen bischollpf.