Dem erebirdigen und geystlichen in got und hern abbt Johannsen abbt zw Lambach meinen genadigen lieben herrn enpewt ich Wolfgang Vleischakcher ym Nidernrauspach an stat mein und meiner swester kinder Wandel saliger gedachtnus mit namen Wolfgang, Peter, Barbara und noch ains des nam ycz nicht wissenlich was und in den kawffbrief geschriben schol werden, ist genant Margrett, fuerr dy selben meiner swesster kinder alle vierew ich mich wemelter Wolfganng Ranspechk ich mit sambt mir angenunben hab, mein gehorsam auch willig dienst wevor an, und fueg ewer genad zw wissen, das ich kawfflichen zw stattem ebigen kawff verkawfft hab all mein und meiner obemelten swester kindt eribschafft und gerechtikait, da fuer ich mich angenunben hab als wir miteinander iglichs gehabt haben auf der Hueben zw Haslich und auf den Puchelguet zw Nyderenentorn, alles gelegen in Gebulczkyricher pharr und Starhenberger gericht und alles eribrecht ist von ewrn genaden und wirdigen gotzhaws Lambach, das selb und soliche obverschribnen unser geleiche eribschafft und gerechtikait mit aller rechtlichen zwegehorung hab ich zw kawffen geben meinem lieben vettern Wolfgangen dem Vleischhaker zw Haslich, Katherina seiner hawsfrawn und allen iren baider eriben, darumben sy uns ein guetz volligs wenugen tan haben mit ainem summ geltz, daran uns yez und fueran ebiklichen wolbenuget und der schon weczalt sein worden. Auf solichs pitt ich wemelter Wolfgang Ranspekch an stat mein und meiner swester kinder ewr gnad in dienmutigen vleis, so dew fuer ewr genad komen mit dem petbrieff und an ewr gnad pegern, wellet im und irn eriben solichen kawff westatten und vetigen, wes sew zw statten kawff nach landes und der herschafft und wirdigen gotzhaws darumben wegern und wedurfen, und so ewr gnadt das tuen, so dann dankch ich ewern gnaden und gelub mit mein trewen aydes weis in krafft des petbrieffs fuer mich, mein eriben und da fuer ich mich angenumben hab und ir eriben und fur meniklichs in ewr in sigel nichtz ze reden in kainer lay weis und sichk ewern gnaden zw urkundt den offen meinen petbrieff gepetschafften durch meiner vleissiger pet willn mit des erbern Stephann Nuspawmer zw Kyrichdorf als ambtman aufgedrukten petschafft, ym und sein eriben an schaden und unengolten ewer gnaden und ewrer wirdigen gotzhaws rechten in allen sachen. Zewgen des kawffs und der pet umb brief und insigel und hye aufgedruktn petschafft Hanns Offenburger, Lienhart Seyvel zw Kyrichdorff und Urban Grintlawcher und ander lewt mer. Datum anno domini etc. lxxxiii^o am suntag Reminiscere in der vasten.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 7-9, Nr. 3009